Алтынньы 20 күнүгэр Чурапчы улууһун Мындаҕаайы ТХПК-гэр Красноярскай кыраай «Новотаежнай» акционернай хаһаайыстыбатыттан 80 кыһыл-эриэн боруода төрүүр тиҥэһэлэр кэллилэр. Сүөһүлэр этэҥҥэ айаннаан кэлэннэр, 30 хонуктаах карантиҥҥа бардылар. Бу туһунан улуус дьаһалтатын пресс-сулууспата иһитиннэрэр.
Сүөһүлэри улуустааҕы тыа хаһаайыстыбатын сайыннарыы ааҕыныстыбатын көмөтүнэн аҕаллылар. «Мындаҕаайы кооперативыгар соһуччу үөскээбит кэккэ күчүмэҕэйдэр сүөһүлэр кэлиилэрин ыһа сыста. Онуоха саҥа үлэлээн эрэр агентство кылгас кэм иһигэр наадалаах докумуоннары бэлэмнээн, эрдэ барбыт кэпсэтиини сөргүтэн, харчы көрдөрөн сүөһүлэр этэҥҥэ хаһаайыстыбаны буллулар», — диир улуус баһылыга Андрей Ноговицын.
Баһылык саҥа тэриллибит тыа хаһаайыстыбатын сайыннарар ааҕыныстыба бу бастакы ситиһиитэ буоларын эттэ. Тэрилтэ тыа хаһаайыстыбатын оҥорон таһаарааччыларыгар мэтэдиичэскэй, юридическэй, экэнэмиичэскэй уонна иһитиннэрэр көмөнү оҥоруохтаах.
Кооперативка үрдүк көрдөрүүлээх боруода сүөһүлэр иккис кэлиилэрэ, оттон Мындаҕаайы кооператив улууска үрдүк көрдөрүүлээх сүөһүлэри тарҕатыыга хаһыс да сылын утумнаахтык үлэлиир.
Кэлиҥҥи сылларга тас сиртэн ыанньык сүөһүлэри аҕалыы республика үрдүнэн киэҥник практикаланан, үлэ ыытыллар. Маныаха, боруоданы тупсарыы, ыанньыкка анаммыт сүөһүлэри олохсутуу, бу барыта олохтоох нэһилиэнньэ натуральнай бородууксуйанан хааччыллыытыгар улахан көмөнү эбэрэ саарбахтаммат.
