Балаҕан ыйын 15-16 күннэригэр түүҥҥү температура намтыырынан Өрөспүүбүлүкэ болуоссатыгар фонтаны дьаһайыы саҕаланыаҕа. Дьаһаллар тымныы кэмигэр тэрил алдьамматын туһугар ыытыллаллар.
Эксплуатациялыыр-техническэй хааччыйыы сулууспатын (СЭТО) кылаабынай инженерэ Ньургун Худогизов бэлиэтээбитинэн, үлэ барыта оҥорон таһаарар собуот техническэй регламенынан кытаанахтык толоруллар.
«Фонтаны тымныы температураҕа туһаныы табыллыбат. Докумуоннарга сурулларынан, носуос оборудованиета уу температуратыгар 0-тан +40 °C диэри үлэлииргэ суоттаммыт. Ирдэнэр бэлиэни аһартахха, көлүөһэ мууһуруута, бүөлэнии саҕаланар. Электромагнитнай клапаннар уонна уу аннынааҕы уот эмиэ боруоктаахтар: систиэмэҕэ уу тоҥуута клапаннар дьөлө тоҥоллоругар уонна сырдатар плафоннара эстэллэригэр тиэрдиэн сөп. Саахалланар быһыы- майгы тахсыбатын туһугар ууну кэмигэр сүөкээһини, систиэмэни баттааһыны уонна фонтан иһитин сабыыны ыытабыт», — диэтэ Ньургун Худогизов.
Инженернэй систиэмэлэри кыстыкка кэмигэр бэлэмнээтэххэ тымныы кэмигэр алдьаныыны тохтотор, онон фонтан өр сылларга үлэлиирин хааччыйыаҕа.
Санатан эттэххэ, СЭТО хамсаабат баай-дуол эбийиэктэрин кэлимник хааччыйыыны уонна туһаныыны оҥорор, ону тэҥэ Ленин болуоссатын уонна Өрөспүүбүлүкэ болуоссатын тутуунан уонна тупсарыынан дьарыктанар.
