Үрүҥ Хайаҕа «Көмүс хатырыктаах-2019» илиминэн муус аннынан балыктааһыҥҥа күрэхтэһии буолла. Түөрт хамаанда кииристэ. Балыктарын нэһилиэк кырдьаҕас дьонугар, долганныы сиэринэн, түҥэһэлээн үллэрэн биэрдилэр, диэн ulus.media иһитиннэрэр.
Анаабыр улууһугар буолбут балыктааһыҥҥа «Конниэс» Степан Туприн, «Харабыл» Юрий Туприн, «Долган» Борис Туприн уонна Үрүҥ Хайатааҕы ДьУоКХ Егор Дьячковскай хамаандалара күрэхтэстилэр.
Бастакы күн балыксыттар илим үттүлэр уонна «Долган» культурнай кииҥҥэ дуобакка, пневматическай бинтиэпкэнэн сыал ытыыга куоталастылар. Иккис күнүгэр туппут балыктарын ыйааһыннаан, кыайыылаахтары биллэрдилэр.
Хамаандалар, балаһыанньа быһыытынан, үстүү киһилээхтэр. Икки кыра харахтаах сэлдээҥки уонна биир улахан харахтаах илимнээх күрэхтэстилэр.
Бастакы миэстэни «Конниэс» ылла, иккиһи «Долган» уонна үһүскэ «Харабыл» уонна ДьУоКХ хамаандалара тигистилэр.
Бу күн уопсайа 70 киилэттэн тахса сэлдэй (күндүөбэй) уонна хара атах (муксуун оҕото) балыктанна.
Ааптар: Евгений Константинов, Анаабыр улууһа, «Анаабыр уоттара» хаһыат
