От ыйын 10 күнүгэр улууска биир бастакынан Өлөөкө Күөллээҕи сылгы Собуотун биригээдэтэ окко киирдэ. Григорий Батюшкин биригэдьиирдээх, икки ас астааччылаах, 5 тиэхиньикэлээх мэхэньисээтэр уолаттар бөһүөлэктэн 2 көстөөх Чоҥкуйа учаастагар айаннаатылар. Кинилэр иннилэригэр туруоруллубут быйылгы былаан 700 туоннаҕа тэҥнэһэр. Сылгы Собуотун салайааччыта Константин Винокуров иһитиннэрэринэн, от үүнүүтэ куһаҕана суох, бу былаантан 250-300 туонна от «Сарыал» пиэрмэ ынах сүөһүтүгэр туһуланар. Отчуттар от ыйын 14 күнүгэр номнуо бастакы хотууру түһэрэннэр, оту урулуоннуу бүүрэр үлэлэрэ саҕаламмыт.
Маны сэргэ, Сиэн Күөлүн нэһилиэгэр от биригээдэтэ эмиэ тустаах үлэтин саҕалаабыт. Ол курдук, от ыйын 16 күнүгэр 6 үлэһиттээх, үс тиэхиньикэлээх, Родион Бандеров салайыытынан сылгы Собуотун филиалын биригээдэтэ Илин Эбэ ходуһатыгар киирдэ. Быйылгы былаан быһыытынан, кинилэр 400 туонна от бэлэмниэхтээхтэр. От ыйын 20 күнүн туругунан, бааһынай хаһаайыстыбалаах Иван Иванович Лаптев номнуо 18 тонна оту оттоото. Сиэн Күөлүгэр быйыл от үүнүүтэ мөлтөх, ол эрэн хас биирдии үтүө күнү баттаһан, күнү-дьылы кэтээн туран үлэни күүстээхтик ыыттахха, от былаана туолуоҕа, диэн тыа хаһаайыстыбатын исписэлииһэ Алексей Кондаков иһитиннэрдэ.
Саргылана Кокорина
