Быйыл окко былаан — 474 482 туонна, 26 867 туонна сиилэс, 14 766 туонна сенаж бэлэмнэниэ. Бырабыыталыстыба бэрэссэдээтэлин солбуйааччы Михаил Никифоров кураан сыл туран миэстэтигэр тэрээһин үлэтиттэн хомуур түмүгэ улахан тутулуктаах буолуон өрөспүүбүлүкэҕэ от хаамыытын дьүүллэһэр сүбэ мунньахха эттэ.
Тыа хаһаайыстыбатын миниистирин солбуйааччы Николай Афанасьев өрөспүүбүлүкэ бары улуустарыгар кэриэтэ кураан, куйаас сатыылаан от үүнүүтэ мөлтөх буолуон, аһыҥа түһүөн сабаҕалаата. Миниистири солбуйааччы от хомууругар суһал ыстаап тэриллибитин иһитиннэрдэ.
Михаил Никифоров улуус баһылыктарыгар туһаайан, бу нэдиэлэ иһигэр мобильнай биригээдэлэргэ сайаапка түһэрэллэригэр эттэ. Үчүгэй үүнүүлээх улуустарга мобильнай бөлөхтөрү тэрийэллэригэр, атын улуустары кытары кэпсэтэн, үлэни саҕалыыры сүбэлээтэ.
