М.К. Аммосов аатынан Хотугулуу-Илиҥҥи Федеральнай университет выпускниктара «Нюрбинский доктор» уонна «Нюрбинский учитель» муниципальнай бырагыраамалар кыттыылаахтарынан буолуохтарын сөп.
Эдэр специалистары өйүүр миэрэлэр тустарынан муус устар 13 күнүгэр Ньурба оройуонун бэрэстэбиитэллэрэ үрдүк үөрэх кыһатын салалтатын кытта көрсүһүүгэ кэпсээтилэр. Улуус дьаһалтата иһитиннэрбитинэн, «Нюрбинский доктор» бырагырааманан Ньурба улууһугар үлэлии кэлэр эдэр быраастарга уонна медсиэстэрэлэргэ биир кээмэйдээх харчынан компенсация көрүллэр. Улуус баһылыга Борис Попов этэринэн, Ньурбаҕа 2010 сылтан улуус доруобуйатын харыстабылын модернизациялааЇын ыытыллар. «Биһиги медицинскэй тэрилтэлэргэ аныгы оборудованиены атыыласпыппыт, билигин участковай балыыһалар наадалаах техниканан хааччыллан олороллор«, — диэн кини бэлиэтээтэ.
Ньурба улууһугар үөрэх управлениетын начаалынньыга Маргарита Маччасынова араас профиллаах педагогическай каадырдар тиийбэттэрин туһунан эттэ: «Улуус оскуолаларыгар педагогическай каадырдарга наадыйыы уонна кинилэри миэстэтигэр хаалларыы боппуруоһа сытыытык турар. Быйыл «Нюрбинский учитель» саҥа социальнай бырагыраама киирдэҕинэ, улуус оскуолаларыгар үлэҕэ киирбит эдэр учууталлар олорор дьиэнэн хааччыллыыларын боппуруоһа быһаарыллыаҕа. Маны элбэх устудьуон сэргээн, ыйыталаста«.
Көрсүһүүнү ХИФУ педагогическай үөрэхтээһиҥҥэ проректора Михаил Федоров: «Биһиги университеппыт выпускниктарын, эдэр исписэлиистэри тыа сиригэр хаалларан үлэлэтиигэ улахан болҕомтону уурар. Хас биирдии выпускнигы кытта чопчу кэпсэтии барыаҕа«, — диэн түмүктээтэ.
