Кэриэстэбил күнүгэр Нам улууһун киинигэр Кыайыы болуоссатыгар мустан, Аҕа дойду сэриитин буойуттарыгар кэриэстиир миитин буолан ааста.
Сэрии кэмигэр элбэх оҕо ийэтэ-аҕата суох хаалбыта. Сир үрдүгэр ытаһыы-ынчык иһиллибитэ, харах уута халыйбыта, кыа-хаан тохтубута. Маны барытын эттэринэн-хааннарынан билбит биир дойдулаахтарбыт, ытык кырдьаҕастарбыт, Аҕа дойду сэриитин тулаайахтара Елена Габышева, Гертруда Дьяконова, Валентина Винокурова, Татьяна Христофорова, Евдокия Охлопкова, Иосиф Замятин уонна Юрий Атласов уола Василий Атласов кэлэн кыттыыны ыллылар. Маны таһынан, тэрээһиҥҥэ кыайан кэлбэтэх Екатерина Замятина аатын ааттыырбыт оруннаах.
«Нам улууһа» МТ баһылыгын бастакы солбуйааччы Инна Сивцева, Ленскэй нэһилиэк депутаттарын Сэбиэтин председателэ Александр Кириллин, Нам улууһунааҕы социальнай харалта управлениетын начальнига Николай Парников, Нам улууһун ветераннарын Сэбиэтин председателэ Софья Кобякова уонна «Иэйии» ветераннар кулууптарын салайааччы Василий Никонов Кыайыы өрөгөйүн, дьоллоох олох үөрүүтүн аҕалбыт, ийэ дойдуларын көмүскэлигэр, кыргыһыы хонуутугар хорсуннук охтубут буойуттары кэриэстээн, өрүллүбүт гирлянданы болуоссакка уурбуттарын кэннэ, биир мүнүүтэ сүһүөхпүтүгэр туран «улуу чуумпуга» иһийэн ыллыбыт.
Сэрии уоттаах хонуутугар хорсуннук охтубут буойуттары кэриэстиир ытык күҥҥэ Инна Иннокентьевна, Александр Васильевич, Николай Григорьевич, Василий Егорович мустубут ыччаттарга туһаайан, ол алдьархайдаах олох эргиллибэтигэр, эйэлээх олоҕу баҕаран туран тыл эттилэр, сэрии тулаайахтарыгар сэмэй бэлэхтэрин туттардылар.
Ленскэй нэһилиэк Ытык киһитэ, үлэ ветерана Ольга Ядрихинская сэрии оҕолоругар анаан уран, төлөн тыллардаах хомоҕой хоһоону аахта, Партизан, 1 Хомустаах нэһилиэктэрин Ытык киһитэ, үлэ ветерана Иннокентий Иванов «Тыыннаахтар умнубат сыллара» диэн ырыаны ыллаата.
Миитин кэнниттэн Кыайыы скверигэр сэрии тулаайахтара олордубут чэчирдэригэр мустубут ыччат уу кутта. Инникитин даҕаны ыччаттар хос эбэлэрэ, хос эһэлэрэ олордубут мастарын куруутун көрүөхтэрэ-харайыахтара, уу кута сылдьыахтара диэн эрэнэ хааллылар.
