29 Тохсунньу 29.01
  • -48°
  • $ 73,82
  • 83,32

Намнар Россиятааҕы "Кыайыы сиренэ" акцияҕа кытыннылар

15:15, 26 мая 2016
Текст:

Нам улууһугар, республикаҕа бастакы саҕалааһын бэрээдэгинэн, ыам ыйын 25 күнүгэр «Кыайыы сиренэ» диэн РФ акциятын чэрчитинэн Кыайыы скверигэр тыыннаах үүнээйини олордуу үөрүүлээх тэрээһинэ буолла.


Сирень — сырдык өҥнөөх, үчүгэй сыттаах сибэккилээх ыарҕа үүнээйи буолар. Кини арҕаа ыам ыйын саҕаланыытыгар сибэккилэнэр буолан, дьон Улуу Кыайыыны аҕалбыт, бу Улуу күнү мэлдьи санатар үүнээйи курдук ылыналлар.

Бу бэлиэ күҥҥэ Кыайыы скверигэр Нам оскуолаларын уонна гимназиятын үөрэнээччилэрэ, нэһилиэк бэтэрээннэрэ, олохтоохторо халлаан хаҕыһын аахсыбакка муһунна.

IMG_0282

Тэрээһин үөрүүлээх түһүмэҕэр улуус баһылыгын I солбуйааччы Инна Сивцева, улуус бэтэрээннэрин сэбиэтин председателэ Софья Кобякова уонна ыҥырыылаах ыалдьыттар тыл эттилэр, бэтэрээннэргэ, ыалдьыттарга Нам улууһун «Улуу Кыайыы 70 сыла» уонна «Сирень Победы» диэн өйдөбүнньүк бэлиэлэри туттардылар.

«Кыайыы» тэрилтэ салайааччыта Галина Лебедева ыччаты патриотическай тыыҥҥа иитиигэ элбэх өрүттээх үлэни ыытар 1, 2 №-дээх оскуолалар уонна гимназия коллективтарыгар Махтал суруктары, бэлэхтэри туттарда. «Улууска ыччаты партиотическай иитиигэ утумнаах, киэҥ өрүттээх үлэ ыытаргытын, болҕомто уураргытын бэлиэтиибит. бу хайысхаҕа ыытар үлэҕитин биһириибит уонна махталбытын биллэрэбит», — диэтэ кини.

Ыччаттар, үөрэнээччилэр сэргэх үҥкүүлэринэн, Александр Самсонов «Сирень» диэн ырыанан эҕэрдэлээтилэр. 2 №-дээх оскуола үөрэнээччилэрэ бэтэрээннэрбит элбэх ахтыы, кэс тылы суруйбут «Кыайыы болотунатын» тэниччи тардан, Кыайыыны уһансыбыттарбытын санаттылар.

IMG_0309

Улуу Кыайыы 70 сылыгар оҥоһуллубут стеллалар тастарыгар сиреннэри олортубут. Ытык алгысчыт Константин Тихонович саха сиэрин-туомун тутуһан, аал уокка айах тутан үрдүк айыылартан үҥэн-сүктэн көрдөстө, бар дьонун алҕаата, арчылаата.

Тэрээһиҥҥэ Россиятааҕы военнай-патриотическай общество Саха сиринээҕи салаатын председателэ Валерий Чугунов, республикатааҕы «Победа» ГБУ салайааччыта Галина Лебедева, биир дойдулаахпыт, СР норуотун хаһаайыстыбатын үтүөлээх үлэһитэ Мария Габышева, республикатааҕы ветераннар сэбиэттэрин чилиэнэ, пааматынньыктары харыстааһыҥҥа Бүтүн Россиятааҕы общество регионнааҕы салаатын председателэ Руслан Васильев, республика бүттүүнэ киэн туттар, сөбүлүүр ырыаһыта Александр Самсонов уо.д.а. кыттыыны ыллылар.

0
0
29 января 29.01
  • -48°
  • $ 73,82
  • 83,32