“Тулаайах уонна төрөппүт көрүүтэ-истиитэ суох хаалбыт оҕолору дьиэнэн хааччыйыы” республикатааҕы программа чэрчитинэн, бэс ыйын 15 күнүгэр Нам улууһун Ленскэй нэһилиэгэр тутуллубут 14 квартиралаах дьиэ күлүүһүн «Нам улууһа» МТ баһылыгыттан Александр Атласовтан хаһаайыттар үөрүүлээх быһыыга-майгыга туттулар.
Иэримэ дьиэ үөрүүлээх аһыллыытыгар аал уоту оттон, үтүө үгэһинэн, сахалыы сиэринэн-туомунан Константин Тихонов оҕолор этэҥҥэ олороллоругар алгыс тылын эттэ. Маны таһынан, «Ленскэй нэһилиэк» МТ баһылыга Андрей Новгородов хаһаайыттар оҕолоругар сырдыгы, кэрэни, үтүөнү, үчүгэйи билэн, үөрэ-көтө оонньоон-көрүлээн улааттыннар диэн оҕо оонньуур площадкатын ылалларыгар 100 тыһ.солк. сертификат бэлэхтээтэ. Ил Түмэн Государственнай мунньаҕын депутата Николай Румянцев аатыттан солбуйааччыта Григорий Егоров оҕолору эҕэрдэлээн туран анал бэлэҕин, ону сэргэ Партизан, Модут, Хамаҕатта, Үөдэй нэһилиэктэриттэн квартира ылбыт оҕолорго нэһилиэк дьаһалталара сэмэй бэлэхтэрин туттартаатылар.
Александр Атласов, «Нам улууһа» МТ баһылыга: «Дойдубут президенэ, республикабыт Ил Дархана улахан болҕомтолорун уураннар түөрт сыл анараа өттүттэн үлэ тэтимнээхтик саҕалан кэллэ. Онтон ыла Нам улууһугар – уопсайа 37 тулаайах уонна төрөппүт көрүүтэ-истиитэ суох хаалбыт оҕолору дьиэнэн хааччыйдыбыт. Былырыын 15 квартиралаах, икки этээстээх толору хааччыллыылаах мас дьиэ күлүүһүн туттарбыппыт. Онтон быйыл 7 квартиралаах таас, толору хааччыллыылаах дьиэни Хамаҕатта нэһилиэгэр тутар былааннаахпыт». Мария Иннокентьевна, опека уонна попечительство отделын салайааччыта: «2015 сыл атырдьах ыйыгар төгүрүк тулаайах уонна төрөппүт көрүүтэ-истиитэ суох хаалбыт оҕолорго аналлаах икки этээстээх, толору хааччыллыылаах таас дьиэ тутуута саҕаланан баран, быйыл Саха Республикатыгар биллэриллибит нэһилиэнньэлээх пууннары тупсарыы сылыгар үлэҕэ киирбитэ төрөппүтэ суох хаалбыт эдэр оҕолорго сүдү бэлэх буолар. бу дьиэни куонкуруска кыайан Вадим Кутуков салайааччылаах «Намстрой» ХЭТ тэрилтэтэ тутта. Бу үөрүүлээх тэрээһин кэнниттэн хаһаайыттар дьиэлэрин таһын тупсараннар мас олордуохтара» — диэн санааларын үллэһиннилэр.
