16 От ыйа 16.07
  • 17°
  • $ 87,81
  • 95,78

Нам улууһугар ойууру чөлүгэр түһэрии үлэтэ тэтимнээхтик ыытыллар

Хаартыска: Ааптар тиксэриитэ
Читайте нас на
Яндекс Новости
ЯДВ

Урукку сылларга ойуур баһаарын кэнниттэн айылҕа бэйэтэ оһорунар эбит буоллаҕына, кэлиҥҥи кэмҥэ федеральнайдааҕы, республикатааҕы программаларынан ойууру чөлүгэр түһэрии үлэтэ тэтимнээхтик ыытыллар.

Бу үлэни Нам улууһугар 2021 сыллаахтан Сергей Янков генеральнай директордаах «Рекавери Групп» ХЭТ сүрүннүүр. Быйылгыттан «Якутлесресурс» ГАУ эмиэ олордуоҕа.

«Рекавери Групп» ХЭТ Үөдэй, Бөтүҥ, Модут, Таастаах нэһилиэктэригэр мас олордубута. Эрдэтээҥи олордуу түмүгэ көрдөрбүтүнэн бэстэр ситэн-хотон үүнүү 80%-тан тахсыбыт. Олордубут сирдэрин хайаан да кэтээн көрөллөр, үүммэтэх сирдэринэн хос эбии олордон биэрэллэр. Оннук үлэ быйыл Бөтүҥҥэ эмиэ ыытыллыаҕа.

Быйыл салгыы Таастаах сиригэр 146 га иэннээх сиргэ олордоллор. Тэрилтэ мас үүннэрэр питомнигар Иркутскайтан уонна Хабаровскайтан кэлбит бэс умнастарын Александр Охлопков көрөр-истэр.

Сергей Михайлович Хабаровскай кыраай мастара быдан олохсуйан үүнэллэр диэн этэр. Онно Саха сириттэн чугас соҕус сиртэн сиэмэлэри ылан олордоллор эбит.

Мас олордуутугар бэс ыйыгар тыа хаһаайыстыбатын техникумун ойуур хаһаайыстыбатын салаатын устудьуоннара практикаларын чэрчитинэн мас олортулар. Икки хаалбыт ыйдарга олохтоохтор үлэлиэхтэрэ. Үлэһиттэр олорор сирдэрэ-уоттара, астара-үөллэрэ, хамнастара толору хааччыллар, онон үлэһит илии түргэнник көстөр.

Бастаан ойуурга солооһун оҥорон бэлэмнииллэр. Онтон онно 10-12 см үрдүктээх бэс умнастарын 1 м арыттаах гына олордоллор. Мас олордуута күн-дьыл туругуттан көрөн балаҕан ыйын ортотугар диэри ыытыллар.

Бэс биһиги тыйыс усулуобуйабытын быдан тулуйар. Онон, билигин кууран-хатан турар ойуурдар сотору кэминэн кэрэ көстүүлээх, айылҕа кыылларыгар тоҕоостоох буолуоҕа.

Ааптар: Анна Созонова, «Нам улууһа» МТ пресс-сулууспата

Следите за самым важным и интересным в Telegram-канале и WhatsApp-группе ЯСИА