Ил Дархан Айсен Николаев ахсынньы 12 күнүгэр Москваҕа Кремль Александровскай саадыгар «Биллибэт Саллаат уҥуоҕар» мемориалга венок ууруутугар кытынна.
«Биһиги геройдарбыт сырдык ааттарын куруук өрө тутуохпут, кинилэр ааттара Россия историятыгар кыһыл көмүс буукубаларынан суруллаллар. Кинилэр тустарынан сырдык өйдөбүл көлүөнэттэн көлүөнэҕэ бэриллэр», – диэтэ Саха сирин баһылыга.
Тэрээһиҥҥэ Москва куорат национальнай бэлиитикэҕэ уонна регионнар ардыларынааҕы сибээскэ департамент салайааччытын солбуйааччыта Иван Петров кыттыыны ылла. Геройдарга албан аат этиитигэр Саха Өрөспүүбүлүкэтин бырабыыталыстыбатын бэрэстэбиитэллэрэ, Ил Түмэн депутаттара, Дьокуускай куорат думатын депутаттара кытыннылар.
Санаттахха, ахсынньыга Биллибэт саллаат күнэ бэлиэтэнэр. Бырааһынньык Россия территориятыгар уонна тас өттүгэр бойобуой дьайыыларга сырдык тыыннара быстыбыт Россия уонна Сэбиэскэй союз ааттара биллибэккэ хаалбыт буойуттарын үйэтитэр сыалтан тэриллэр. Москваҕа Саха сирин күннэрин кэмигэр история өйдөбүлүгэр анаммыт элбэх дьаһал ыытылынна.
Хаартыска: Андрей Сорокин
