Үөһээ Бүлүү Мэйик нэһилиэгэр муус устар 2 күнүгэр улахан үөрүүлээх, долгутуулаах, дьоро тэрээһин буолан ааста. Нэһилиэк дьаһалтатын уонна олохтоохторун күүһүнэн тутуллубут, саҥалыы тииптээх, икки мэндиэмэннээх, араас дьэрэкээн өҥнөөх кулууп дьиэтэ нэһилиэк хабайар хаба ортотугар дьэндэйэн тахсыбытын маанылаах сиэрэ-туома ыытылынна.
Бу үөрүүлээх түгэн ыраахтан-чугастан ытык-мааны ыалдьыттары үмүру тардан, сарсыардаттан дьолунан толору, үөрүүнэн ситэри түһүлгэ көрө-нара көҕүлүттэн тутулунна. Бас-көс ыалдьыттарынан СР «Ил Тумэн» государственнай мунньаҕын депутата Г. Н. Алексеев, «Мин Сахам сирэ — XI үйэҕэ» үтүө хамсааһын дирекциятын сүрүн специалиһа С. С. Степанов, «Үөһээ Бүлүү улууһа» МТ баһылыгын бастакы солбуйааччыта А. И. Неустроев,о.д.а бааллар.
Үгэс быһыытынан, тэрээһин саҕаланыытыгар таһырдьа туран арыылаах алаадьынан, уохтаах кымыһынан аал уоту аһатан, алҕаан баран, аалай кыһыл лиэнтэни быһан, культура саҥа киинин символическай күлүүһүн олохтоох биригээдэ биригэдьиирэ В.Н. Ефимов кулууп директора Джемма Иннокентьевнаҕа туттарда. Иһирдьэ киирдэххэ, дэриэбинэттэн эмискэ куоракка баар буолбут курдук санана түһэҕин. Кулууп элбэх функциялаах буолан, библиотека, ветстанция, дьаһалта, толору инвентардаах тренажернай зал, аҕыс атахтаах, улахан остуоллаах бильярдыыр хос, кыһыҥҥы сад фойета сөрү-сөпкө батан тураллар. Улахан залга киирдэххэ киэҥэ-куоҥа, уота-күөһэ сырдыга тута харахха быраҕыллар. Арай, киһи сонньуйара диэн, көрөөччүлэр олорор кириэһилэлэрэ эргэ эбит.
Улуус баһылыгын бастакы солбуйааччыта А. И. Неустроев Мэйик кулуубугар 1976 сылтан директорынан бэриниилээхтик үлэлии-хамсыы сылдьар, Мэйик нэһилиэгин бочуоттаах олохтооҕор, депутатыгар Джемма Иннокентьевна Федотоваҕа «СР культуратын үтүөлээх үлэһитэ» түөскэ анньыллар анал бэлиэни үөрүүлээх быһыыга-майгыга туттарда. Ол кэннэ утуу-субуу эҕэрдэ нүөмэрдэр быыстарыгар кэлбит ыалдьыттар тахсан тыл эттилэр, Джемма Иннокентьевнаны сыралаах үлэтэ илэ-чахчы сыаналаммытынан эҕэрдэлээтилэр, СР Ил Дарханыттан тиийэ махтал суруктары, сертификаттары, бэлэхтэри туттардылар. Нэһилиэк баһылыга М.М. Хаччагаев кэлбит ыалдьыттарга махтанан туран, кулууп тутуллуутугар сыраларын-сылбаларын уурбут биир дойдулаахтарыгар махтал суруктарын, сэмэй бэлэхтэрин туттартаата. Өссө биир үөрүүлээх сонунунан Үөһээ Бүлүү улууһун культуратын департаменын директора В.П. Спиридонов Мэйик культуратын киинигэр көрөөччүлэр олороллоругар анаан сымнаҕас олбохтоох кириэһилэлэринэн хааччыйыах буолбута ытыс доҕуһуолунан ылылынна. Үөһээ Бүлүүтээҕи киин библиотека үлэһиттэрэ 1975 сылтан Мэйик библиотекатыгар сэбиэдиссэйдиир, ССРС культуратын туйгуна, Мэйик нэһилиэгин бочуоттаах олохтооҕо, үлэ ветерана Иванова Галина Абрамовнаны саҥа библиотекаҕа көһөн киирбитинэн эҕэрдэлээтилэр итиэннэ харчынан сертификат анаатылар. Дьокуускайга олорор «Мэйик» түмсүү дьоно-сэргэтэ саҥа культура киинигэр анаан харчынан кыттыһан, 80-тан тахса тыһыынча суумаҕа иистэнэр массыына, мас тардыһарга эрчиллэр тренажер уонна видеокамера бэлэх ууннулар. Үөһээ Бүлүүтээҕи «Сайылык» түмсүү 50-тан тахса тыһыынчаны хомуйан, сертификат туттарда.
Үөрүүлээх чаас кэннэ үргүлдьү кэнсиэрт саҕаланна. Оҕо саадын иитиллээччилэриттэн саҕалаан, сыана бэтэрээннэригэр тиийэ бииртэн биир үчүгэй нүөмэрдэр тахсан көрөөччүлэри сөхтөрдүлэр.
Мэйиктэр уруккуттан да түмсүүлээхтэринэн, культурнай-маассабай өттүнэн көхтөөхтөрүнэн, үлэһиттэринэн биллэллэр. Кэлин Михаил Макарович баһылыгынан талыллыаҕыттан үгүс үлэ ыытылынна диэн бэлиэтиэххэ наада. Ол курдук, кэлиҥҥи сылларга балыыһа дьиэтэ, кииннэммит котельнай, саҥа кулууп үлэҕэ киирдилэр. Бу барыта Мэйик нэһилиэгин олохтоохторун күүстэринэн-күдэхтэринэн тутуллубута саарбаҕа суох. Аны кэлэр өттүгэр оҕо саадын тутуутун былааннарыгар туруораллар. Мэйик нэһилиэгэ бу ырыынак, үп ытарчатын кэмигэр баараҕай тутуулары дьэндэппитин көрөн киһи эрэ сөҕөр. Бу барыта олохтоохторго уонна Мэйиктэн төрүттээхтэргэ киэн туттуу тыынын саҕар, сомоҕолостоххо, түмүстэххэ хайдахтаах да уустуктары туоруохха сөбүн туоһулуур. Оннук да буола турдун!
