Арассыыйа социальнай пуондатын Саха сиринээҕи отделениета 11 671 мэдиссиинэ үлэһитигэр анал социальнай төлөбүрү оҥорор. 2026 сылтан бу сыалга 943,7 мөлүйүөн солкуобайтан тахса үп ыытылынна.
Бу өйөбүл миэрэтэ доруобуйа харыстабылын бастакы сүһүөх звенотун, оройуоннааҕы балыыһалар уонна суһал көмө сулууспаларын үлэһиттэригэр ананар. Төрүт усулуобуйатынан кинилэр үлэлиир мэдиссиинэ тэрилтэлэрэ судаарыстыбаннай эбэтэр муниципальнай буолуохтаахтар уонна булгуччулаах мэдиссиинэ страховкатын бырагыраамаларыгар кыттыахтаахтар.
Саха сирин куораттарыгар уонна нэһилиэнньэтэ 50 тыһыынчаҕа диэри ахсааннаах сэлиэнньэлэригэр төлөбүр муҥутуур кээмэйэ: быраастарга — 50 тыһыынча солкуобай, орто мэдиссиинэ персоналыгар — 30 тыһыынча солкуобай. Нэһилиэнньэтин ахсаана 50-тан 100 тыһыынчаҕа диэри — быраастарга 29 уонна орто мэдиссиинэ персоналыгар 13 тыһыынча солкуобай. 100 тыһыынчаттан тахса нэһилиэнньэлээх сиргэ — 18,5 уонна 8 тыһыынча солкуобай.
«Ый аайы мэдиссиинэ тэрилтэлэрэ анал социальнай төлөбүргэ хандьыдаат буолар үлэһиттэрин испииһэгин электроннай реестрин оҥорон, пуонда отделениетыгар ыыталлар. Ити дааннайдары тутан баран, биир нэдиэлэ иһигэр үп үлэһиттэр счеттарыгар түһэр. Бэйэлэрэ тугу да гынар наадата суох — төлөбүрдэр быһа эрэһииминэн ааҕыллаллар. Анал социальнай төлөбүр кээмэйин «Госуслуги» порталга тус кабинекка көрүөхтэрин сөп», — диэн СӨ АСП отделениетын управляющайа Марина Герман бэлиэтиир.
