Бу күннэргэ оскуола кыстык отун бэлэмнээн бүттэ. Барыта уон икки бастакы суортаах от кэбиһиллибитин туһунан, «Эркээйи» хаһыат суруйар.
Балыктаах агро-оскуолата Илин Күөллэрики диэн 55 гаалаах улахан алааһыгар оттуур. Оскуола биир үөрдээх – сэттэ биэлээх атыыр. Сылгылары күһүнүн оскуола наадатыгар тутталлар. Оҕолор аһылыктарыгар, “бартердыыллар даҕаны”, этин киилэтигэр да атыылыыллар.
Отчуттар барыта тоҕус күн оттообуттар. Хомуур үлэтигэр оскуола дириэктэрэ, учууталлара, техүлэһиттэр ким бириэмэлээх бары кэлэн үлэлээбит.
От-мас үлэтин сүрүннүүр киһиннэн Михаил Черкашин буолар. Оскуолаҕа 2000 сыллар иннилэриттэн үлэлээн кэлбит. Сопхуос саҕаттан тутуу эйгэтигэр “МТЗ” тыраахтар уруулугар олорон үлэлээбит улуус биир кырдьаҕас механизатора. Тыраахтарыыстаабыта түөрт уонча сыл буолбут.
– Алаас быйыл уута уолан биэрэн ото бэркэ үүммүт, – диэн кэпсээтэ Михаил Николаевич. – Онон ылбыт оппут барыта кэриэтэ уолба ото буолла. Уон икки сыһылбаны (кэбиһиилээх отторун итинник ааттыыллар) туруордубут. Балтараалыы, иккилии, сороҕор, иккиттэн тахсалыы туонналаах оттор буоллулар. Үрдүк өттө курааннаабыт, халтай сытар. Отторбут бастакы суортаахха киирсэллэр. Бэттиэмэ, хара да оттоох, уу ото даҕаны… Ходуһаҕа үлэлээбиппит тохсус күммүт. Хомууругар ким бириэмэлээх бары кэлэн үлэлээтилэр. Учууталлар, техүлэһиттэр. Дириэктэр бэҕэһээ күнү быһа үлэлэспитэ.
Охсуутугар эмиэ оскуола техүлэһитэ Егор Сотниковтыын иккиэн үлэлээбиттэр. Кини “Беларус” ротор охсорунан, Егор Васильевич “Донг Фен” тыраахтарга түргэнник охсорунан оҕустарбыттар. Кэбиһэргэ стогометателы туһаналлар. Барыта тиэхиньикэ туһаныллар буолан от үлэтин тулуппаттар эбит.
Михаил Черкашин кэпсииринэн, Балыктаах оскуолата быйылгы күөххэ биир үөрдээх – сэттэ биэлээх атыыр. Сылгыларын базата нэһилиэк илин өттүгэр баар эрээри, онно сылгылар тиийэллэр-тиийбэттэр. Убаһаны күһүҥҥү араарыыны ыытарга чугас буоллун диэн Илин Күөллэрикигэ оскуола үлэһиттэрэ “кыбытык” күрүө-хаһаа туппуттар. Сылгылары күһүнүн оскуола наадатыгар тутталлар. Оҕолор аһылыктарыгар, “бартердыыллар даҕаны”, этин киилэтигэр да атыылыыллар. Кини бэйэтэ эмиэ уонча сылгылаах. Олорун кыһын оскуола сылгыларын кытары холбуу көрөр. Сайынын туһунан бараллар. Кэлэ-бара сылдьаллар. Туспа ыырдаахтар. Алаҕарга тиийэ бараллар.
Нэһилиэк тутаах тэрилтэтин баар-суох быйаҥнаах алааһа Илин Күөллэрики барахсан быйыл уулаах өттүттэн “ыган” туран отуттан лаппа бэрсибит эбит.
