Масыанньыктар Саха сирин олохтоохторун араас «ньыманы» туттан албынныыр, түөкүннүүр буоллулар. Биир түбэлтэни «Сахатранснефтегаз» салайааччыта Алексей Колодезников кэпсээтэ.
Алексей Колодезников эппитинэн, 2024 сыл бүтүүтэ масыанньыктар «Горгаз» тэрилтэ үлэһитэбит диэн бэйэлэрин билиһиннэрэн, өрөмүөн үлэтин туһунан ыйыталаспыттар. Киһи чахчы өрөмүөн үлэтэ барбытын туоһулаатаҕына, масыанньыктар үлэ түмүгүн бэрэбиэркэлииллэрин уонна дуогабар түһэрсэллэрин этэллэр.
«Кинилэр дуогабары «Госуслуги» портал нөҥүө ыыталларын эппиттэр уонна СМС-нан кэлбит пароль этиллиэхтээҕин модьуйбуттар. Болҕомтолоох буолуҥ уонна өйдөөҥ, «Сахатранснефтегаз» үлэһиттэрэ төлөпүөннээбэттэр уонна пароль көрдөөбөттөр», — диэтэ Колодезников.
