Тохсунньу 1 күнүттэн 2027 сыллааҕы хамнас алын кээмэйэ, сабаҕалааһынынан, быһа холоон 31-32 тыһыынча солкуобайга тиийэ үрдүөҕэ, диэн Госдуума бүддьүөт уонна нолуок кэмитиэтин бэрэссэдээтэлин солбуйааччы Каплан Панеш «Парламент хаһыатыгар» иһитиннэрдэ. Хамнас алын кээмэйэ үрдээһинэ туохха сабыдыаллыай уонна хайдах суоттанарый.
Хайдах суоттанарый
МРОТ — бу үлэ биэрээччи үлэһиттэригэр төлүүр хамнаһын саамай алын кээмэйэ. Үлэ ураты майгытын иһин эбии төлөбүрү эбэтэр оройуон коэффициеннарын ити сууматтан таһынан ааҕаллар. Ол эрээри, бу ааҕыы толору үлэлээбит ыйга көрүллэр хамнас, онон, холобур, ыстаапка аҥарыгар, киһиэхэ төлөбүр алын кээмэйэ эмиэ икки төгүл намыһах буолуоҕа.
Кэлэр сылга МРОТ кээмэйин туспа сокуонунан бигэргэтэллэр, үгэс быһыытынан күһүн бүтүүтүгэр, кэлэр үс сыл бюджетын кытта ылыналлар. МРОТу үрдэтии туһунан сокуону Госдуумаҕа Бырабыыталыстыба киллэрэр.
«Тохсунньу 1 күнүттэн 2027 сыллааҕы хамнас алын кээмэйэ, сабаҕалааһынынан, быһа холоон 31-32 тыһыынча солкуобайга тиийэ үрдүөҕэ. Бу кэнники сылларга олохтоммут МРОТу урутаан үрдэтии бэлиитикэтин салҕааһын», — диэн Каплан Панеш бэлиэтээтэ.
Атын төлөбүрдэр
МРОТ үрдээһинэ хамнас структуратыгар эрэ буолбакка, социальнай төлөбүр систиэмэтигэр эмиэ дьайыаҕа. Холобур, бу оҕо төрүүрүгэр босуобуйа, балтараа сааһыгар диэри оҕону көрүүгэ ыйдааҕы төлөбүрдэр. Дьахтар официальнайдык дохуота суох буоллаҕына эбэтэр хамнаһа олохтоммут алын кээмэйтэн намыһах буоллаҕына, босуобуйаны ааҕарга МРОТ тутталлар.
МРОТ алимент кээмэйигэр эмиэ дьайар. Урукку кэргэнниилэр алимент туһунан суут уурааҕын ылбатахтарына эбэтэр нотариальнай сөбүлэҥи оҥорботохторуна, алимент маннык суоттанар: МРОТ чиэппэрэ биир оҕоҕо, үс гыммыт биирэ икки оҕоҕо, аҥара үс уонна онтон элбэх оҕоҕо.
Больничнай кээмэйэ страховой ыстаастан уонна үлэһит урукку икки сыллааҕы орто хамнаһыттан тутулуктаах. Киһи бу кэмҥэ үлэлээбэтэҕинэ, орто хамнаһы страховой түбэлтэ кэлбит күнүгэр олохтоммут МРОТ-ка тэҥнээн ааҕыахтара.
