Саха сирин соҕуруу өттүттэн фроҥҥа уочараттаах массыына рейса ыытылынна. Автофургон анал байыаннай дьайыы зонатыгар үс техника, аадырыстаах баһыылкалар уонна 3,5 туоннаттан тахса гуманитарнай таһаҕаһы илдьэр. Арассыыйа Сэбилэниилээх Күүстэрин байыастарыгар көмөнү Алдан уонна Нерюнгри куораттар, ону таһынан кинилэргэ чугас бөһүөлэктэр олохтоохторо хомуйдулар.
Бу туһунан балаҕан ыйын 10 күнүгэр брифиҥҥэ «Кыайыыга Бииргэ!” хамыыһыйа өрөспүүбүлүкэтээҕи штабын сүрүннүүр киинин бэрэстэбиитэлэ Евгения Васильева эттэ.
«Кэлэр нэдиэлэҕэ Дьокуускайтан уочараттаах автофургону ыытыы былааннанар. Кини Саха сирин тирэх пуунугар анал техниканы, гуманитарнай көмөнү уонна аадырыстаах баһыылкалары аҕалыаҕа», — диэн Евгения Васильева эбэн эттэ.
Кини сыл саҕаланыаҕыттан өрөспүүбүлүкэттэн анал байыаннай дьайыы зонатыгар 41 рейс оҥоһуллубутун чуолкайдаата. 117 техника уонна 231 туоннаттан тахса гуманитарнай таһаҕас тиэрдилиннэ.
