Балаҕан ыйын 10 күнүн туругунан, Саха сирин сүрүн пассажирскай уонна таһаҕас тиэйэр тэрилтэлэрэ уматык-оҕунуох матырыйаалынан толору хааччыллан тураллар. Тырааныспар үлэтигэр харгыстар бэлиэтэммэтилэр, бары тэрилтэлэр эрэһиим быһыытынан үлэлииллэр, диэн өрөспүүбүлүкэ тырааныспарга министиэристибэтэ иһитиннэрэр.
Тустаах салааҕа уматык кээмэйин СӨ Тырааныспарга уонна суол хаһаайыстыбатыгар министиэристибэтин иһинэн тэриллибит анал ыстаап хонтуруоллуур.
Исписэлиистэр күн аайы быһыыны-майгыны кэтээн көрөллөр уонна ханнык баҕарар уларыйыыларга түргэнник дьаһанар, кутталлары сэрэтэр сыаллаах тырааныспар хампаанньаларын кытта суһаллык сибээстэһэллэр.
