Икки өрөспүүбүлүкэ дэлэгээссийэтэ тыа хаһаайыстыбатын тиэхиньикэтин уонна тэрилин хааччыйыы бопуруостарыгар сыһыаннаан көрүстүлэр, суруйда Саха парламент саайт.
Беларусь өрөспүүбүлүкэтин дэлэгээссийэтин «МТЗ-Сибирь Эргиэн дьиэтэ» ААУо генеральнай дириэктэрин кэммиэрсийэҕэ көмөлөһөөччүтэ, Минскэйдээҕи тыраахтар собуотун Сибииргэ уонна Уһук Илиҥҥэ официальнай бэрэстэбиитэлэ Надежда Дрыгина салайда. Саха Өрөспүүбүлүкэтин дэлэгээссийэтин састаабыгар тыа хаһаайыстыбатын уонна ас-үөл бэлиитикэтин миниистирин э.т. Анна Стручкова, «Сиртэн үүнээйини ылыы, мелиорация уонна тыа хаһаайыстыбатын уунан хааччыйыы управлениета» судаарыстыба бүддьүөтүн тэрилтэтин материальнай-тиэхиньиичэскэй хааччыйыыга салаатын начальнига Николай Черкашин уонна «Түмэн» ТХПК бэрэссэдээтэлэ Том Макаров үлэлээтилэр.
– Биһиги тиэхиникэлэрбит тыйыс айылҕалаах хотугу сир айылҕатыгар сөп түбэһэллэр, Саха Сиригэр икки дилердаахпыт: Дьокуускайга «ВостокЕвроТехника» уонна Аллараа Бэстээххэ Руслан Федотов биирдэм тэрилтэтэ. Онон суол сабыллыбыт да кэмигэр тиэхиньикэ харыыта суох хааччыллар, – диэтэ Надежда Дрыгина уонна хампаанньа Саха Өрөспүүбүлүкэтин кытары бииргэ үлэлээбитэ 15 сыл буолбутун бэлиэтээтэ.
Тыа хаһаайыстыбатын уонна ас-үөл бэлиитикэтин миниистирин э.т. Анна Стручкова өрөспүүбүлүкэ тыа хаһаайыстыбатыгар аналлаах тиэхиньикэни уонна тэрили саҥардан иһиигэ интэриэһэ улаханын эттэ.
– Аграрийдары өйөөһүҥҥэ биһиэхэ сүөһү аһылыгын бэлэмнээһиҥҥэ уонна сүөһү иитиитин сайыннарыыга туһуламмыт икки бырагыраамма үлэлиир, олор чэрчилэринэн тыа хаһаайыстыбатын тиэхиньикэтин атыылаһыы ороскуотун сорох чааһын толуйуу көрүллэр. Биһиги бииргэ үлэлээһин усулуобуйаларын туһунан дьүүллэһигэ аһаҕаспыт, – диэтэ диэн Тыа хаһаайыстыбатын уонна ас-үөл бэлиитикэтин министиэристибэтин пресс-киинэ иһитиннэрэр.
