Ирдэбил үрдээбитинэн массыына сапыраапкалыыр ыстаансыйаларга ноҕурууската лаппа улааппыта бэлиэтэнэр, сүрүн болҕомто Дьокуускайга баар балаһыанньаҕа уурулунна.
Саха сиригэр нэһилиэнньэни ирдэбил үрдээбит усулуобуйатыгар бэнсиининэн хааччыйыыүлэтин күүһүрдүөхтэрэ.
Ил Дархан Айсен Николаев бу боппуруоһунан суһал ыстаап мунньаҕын ыытта.
—Билиҥҥи быһыы-майгы өрөспүүбүлүкэ эрэ кыһалҕата буолбатах. Арассыыйа кэккэ субъектарыгар ньиэби переработкалыыр собуоттарга пилота суох көтөр аппарааттар кимиилэрэ дойду үрдүнэн ньиэп бородуукталарын тиэйиитэ, аҕалыыта уустуктары үөскэтэн, Саха сирэ атын эрэгийиэннэр курдук, ити харгыстары көрсөр. Ол эрээри ырыынагы туруктаах оҥоруу үлэтэ тиһиктээхтик ыытыллар, — диэтэ Айсен Николаев.
Эрэгийиэн баһылыга олохтоохторго табыгастаах буоларын курдук сапыраапкалар ахсааннарын элбэтээри, чааһынай АЗС ситимнэригэр табаарынай сойуом көрүҥүнэн бэнсиини биэрэр кыаҕы суһаллык үлэлэтэргэ сорудахтаата. Федеральнай суһал ыстаап уонна ньиэп хампаанньаларын кытта эбии тиэйиигэ үлэ салҕанар. Саҥа хантараактары түһэрсэр, сөбүлэһии түһэрсиллибит хааччыйыыларын түргэтэтэр уонна тиэйиигэ, тиэрдиигэ хайаан да бастакынан хааччыйар соруктар туруорулуннулар.
Үөскээбит усулуобуйаҕа Саха сирин олохтоохторун хааччыйыыга «Саханефтегазсбыт» судаарыстыбаннай хампаанньа улахан оруолу ылар. Чуолаан онно Дьокуускайга бэнсиини көҥүл атыылааһын улахан өттө тиксэр. Хампаанньа түөрт сапыраапката уматыгы харчынан уонна харчыта суох ааҕыыга ыыталлар.
Айсен Николаев АЗС ыстаансыйаларыгар бэрээдэги хааччыйыыны туспа бэлиэтээтэ. Ил Дархан олохтоохтор суруйууларын улахан аҥара уһуннук кэтэһиини эрэ буолбакка, уочараттары бэйэлэрэ тэрийэллэрин кытта сибээстээҕин бэлиэтээбиттэрин эттэ.
Куорат салалталарыгар уонна тэрилтэлэр салайааччыларыгар бу үлэҕэ муҥутуурдук кыттыыны ылалларыгар сорудахтанна. Наада буоллаҕына бэрээдэги тутуһарга уонна куттал суох буолуутун хааччыйарга быраап күүһэ тардыллыахтаах. Хас биирдии АЗС-ка массыына сырыытын тэрийэргэ, баар уматыгы үллэрэр колонкалар бары тохтоло суох үлэлииллэрин хааччыйарга уонна оборудование тохтообокко үлэлиирин тэрийэргэ этилиннэ.
—Быһыы-майгы биһигиттэн муҥутуур түмсүүлээх, суһал буолууну эрэйэр. Биһиги хайдах-туох быһыылаахтык үлэлиэххэ сөбүн толкуйдаабыппыт, билигин ол тэрээһин сатарыйыиыан наада. Тэрилтэлэр салайааччылара уонна куорат былаастара миэстэлэргэ быһаччы сылдьыахтаахтар, дьоҥҥо көмөлөһүөхтээхтэр уонна үлэ-хамнас барыытын сүрүннүөхтэрин наада. Быһыы-майгы биир күн иһигэр уларыйыа суоҕа эрээри, биһиги туох кыалларын барытын оҥорорго кыһаллабыт, — диэн Айсен Николаев тоһоҕолоон бэлиэтээтэ.
Мунньах түмүгүнэн Ил Дархан СӨ Бырабыыталыстыбатын суһал ыстаабын үлэтин түргэнник хоруйдуур эрэсиимҥэ көһөрөргө соруйда. Уматык саппааһын, кэлиитин уонна батарыытын балаһыанньата күн аайы кэтээн көрүллүөхтээх, онтон быһаарыылар билиҥҥи быһыыга-майгыга олоҕуран ылыллыахтаахтар.
Сиһилии: https://www.sakha.gov.ru/news/60306
СӨ Ил Дарханын уонна Бырабыыталыстыбатын пресс-сулууспата
