Үөһээ Бүлүүгэ ыытыллар Манчаары оонньууларыгар хапсаҕайга муҥутуур кыайыылаахха сылгы үөрүн туттарыахтара. Оонньуулар от ыйын 6-9 күннэригэр буолаллар.
Хапсаҕай Федерациятын Кубогын билиҥҥи хаһаайыттарын дойдуларыгар өрөспүүбүлүкэ бастыҥ хапсаҕайдьыттара мустуохтара. Киирсиилэр САССР-гар хапсаҕайга киирсии бастакы муҥутуур кыайыылааҕа Василий Степанов-Буучугурас 80 сылыгар ананаллар.
«Талар күрэхтэһиилэр кэннилэриттэн, хапсаҕайга Манчаары оонньууларыгар кыттар быраабы 272 бөҕөс: эр дьон, бэтэрээннэр, уолаттар ыллылар. Кинилэр 17 ыйааһыҥҥа бастыыр иһин киирсиэхтэрэ«, — диэн хапсаҕай федерациятын толорооччу дириэктэрэ Алексей Мостахов СИА-ҕа иһитиннэрдэ.
Быйылгы оонньууларга хапсаҕайга ураты болҕомто ууруллуо. Кыайыыны өрөгөйдөөбүт спортсмеҥҥа сылгы үөрэ туттарыллыа. Хамаандалар муҥутуур кыайыылааҕы быһаарыыга спортсмены кытта сөбүлэсиһэн, кини ханна олороруттан тутулуга суох, кими баҕарар киллэрэр кыахтаахтар.
Хас биирдии баһылык бириис фондатыгар биирдии сылгыны туруорар. Хотторбут хамаанда кыайыылаахха акка сертификатын туттарар. Бастакы эргиир кэнниттэн өрүттэр бэйэ икки ардыгар хас аты туруорары кэпсэтэллэр. Финалга киирбиттэр хапсаҕайга күрэхтэһии кэмигэр ылбыт бириистэрин аҥарыттан аҕыйаҕа суоҕу уксаллара усулуобуйанан ирдэнэр. Түмүккэ биир сылгы үөрэ бириис быһыытынан тахсан кэлиэхтээх.
«Уһулуччу бу кини кыайыа диэн кими да тоһоҕолоон эппэппин. Бары тэҥ баайыылаахтар, бары кыайыыга дьулуурдаахтар. Холобур, Олоҥхо ыһыаҕар Дмитрий Акимов күүстээхтэринэн биллэр Увар Тимофеевы, Николай Николаевы, Семен Семеновы сабарыйталаабыта. Бу киирсиилэр хоһууттарбытыгар үчүгэй уруок биэрбит буолуохтаах. Өссө араас таһымнаах турнирдар кыайыылаахтара бааллар — Юрий Старостин, Евгений Алексеев, Игорь Софронеев уонна да атыттар. Саха сиригэр быйылгы күөн-көрсүү сүрүн бирииһи ылар кыахтаах элбэх спортсмен баар«, — диэтэ Мостахов.
