Быйыл Саха сиригэр «Өлбөт үөстээх пуолка» аахсыйа үгэс быһыытынан ыытыллыаҕа. Бу туһунан Ил Дархан Айсен Николаев иһитиннэрдэ.
«Биһиги өрөспүүбүлүкэбитигэр «Өлбөт үөстээх пуолка» — бу чугас дьоммут, Кыайыы туһугар охсуспут, сэрии ыар кыһалҕаларын ааспыт уонна дойдубутун көмүскээбит дьоммут туһунан тыыннаах өйдөбүнньүк. Аҕа дойду Улуу сэриитэ хас биирдии дьиэ кэргэни таарыйбыта, ол иһин бу аахсыйа көлүөнэлэри дьиҥнээхтик түмэр», — диэн Айсен Николаев МАХ-гар суруйда.
Саха сирин Ил Дархана өрөспүүбүлүкэ олохтоохторун ыам ыйын 9 күнүгэр буолар хаамыыга кыттарга ыҥырда.
«Ыам ыйын 9 күнүгэр, Кыайыы күнүгэр, биһиги эмиэ бииргэ, биир кэккэнэн, геройдарбыт мэтириэттэрин тутан хаамыахпыт. Бүтүн дойдуга сүдү суолталаах бу күҥҥэ биһиги кыайыылаах көлүөнэҕэ дириҥ ытыктабылбытын биллэрэн, Ийэ дойду көҥүлүн уонна тутулуга суох буолуутун турууласпыттары ахтан-санаан ааһыахпыт. Бу норуот хорсун быһыытын туһунан кырдьыгы харыстаан, кэлэр көлүөнэлэргэ тиэрдэр уопсай өйдөбүнньүк, махтал уонна эппиэтинэс күнэ», — диэн Айсен Николаев бэлиэтээтэ.
Кыайыы күнүн көрсө Дьокуускайга «Георгиевскай лиэнтэ», «Кыайыы дьыктаана», «Олбуорунан ыллыыбыт», «Өйдөбүнньүк чүмэчитэ», «Кыайыы түннүктэрэ» аахсыйалар ыытыллыахтара. Өрөспүүбүлүкэ киин куоратыгар сүрүн тэрээһиннэр ыам ыйын 8 уонна 9 күннэригэр буолуохтара. Орджоникидзе болуоссатыттан Доҕордоһуу болуоссатыгар диэри учаастакка кэнсиэр уонна патриотическай былаһааккалар тэриллиэхтэрэ.
Үөрүүлээх бырагыраама өрөспүүбүлүкэ бары оройуоннарыгар былааннанар.
