«ВИС» бөлөх уҥа пилоҥҥа анаан Өлүөнэ муостатын тутууга аналлаах коффердамы өрүс түгэҕэр бырайыактаах миэстэтигэр туруорда, диэн хампаанньа иһитиннэрдэ.
Уопсай ыйааһына 2200-тан тахса туонна, үрдүгэ 17,5 миэтэрэ тимир конструкция уҥа кытылтан 300 м. тэйиччи состорон аҕалылынна уонна дьаахырга туттарылынна. Атырдьах ыйын 21 күнүгэр коффердам былаан быһыытынан тимирдиллэн, өрүс түгэҕэр турда.
«ВИС» бөлөх генеральнай дириэктэрэ Сергей Юдин эппитинэн, бастаан биир эрэ коффердамы туруорар былааннаахтара, ол эрэн болдьоҕу тутуһар сыалтан бу сайын иккини туруорарга быһаарыммыттар. Ортоку пилон коффердамар хайыы-үйэ үүттүүр үлэлэр ыытыллаллар.
Халаан уута күүскэ кэлэринэн, муус устарынан уонна тутуу сезона кылгаһынан сибээстээн, наплавной (устар) коффердамнары талбыттар. Бу технология Арассыыйа муоста тутуутугар бастакытын туттуллар. Тутууга барыта 19 араас кылаастаах суудуна кыттар. Уҥа коффердамы таһаарар үлэ атырдьах ыйын 19 күнүттэн саҕаламмыта. Манна анаан өрүс түгэҕин дириҥэтэр үлэлэр барбыттара — 138 тыһыынча кубометр буору хостообуттар. Коффердам турбутун кэнниттэн иһигэр кураанах зона баар буолбут, онно сыбаайалары туруорар үүттүүр тэриллэр туруохтара.
Тутуу «Олох инфраструктурата» национальнай бырайыак чэрчитинэн ыытыллар.
