28 Кулун тутар 28.03
  • -13°
  • $ 92,26
  • 99,71

Өлөөн сиригэр-уотугар уоспа ыарыыны эмтээбит Лидия Облезова туһунан киинэни уһулуохтара

16:42, 07 октября 2016
Текст:
Читайте нас на
Яндекс Новости
ЯДВ

Өлөөн улууһугар СР культураҕа уонна духуобунай сайдыыга миниистрин солбуйааччыта Макаров Николай Афанасьевич уонна режиссер Лукин Александр Владимирович кэлэн культура үлэһиттэрин, улуус ытык кырдьаҕастарын кытта атах тэпсэн олорон кэпсэтэн, санаа атастаһан бардылар.


1937 сыллаахха Дьэлиҥдэҕэ ыраах Орел куораттан кэлбит удьуор эмчиттэр кыыстара Лидия Облезова олохтоохтору уоспаттан дьоруойдуу эмтээбитин (уоспаттан 80 киһи өлбүт) туһунан историческэй киинэ устуутугар тэрээһин үлэ туһунан кэпсэттилэр.

Александр Лукин:

— Билигин Арктика тиэмэтэ аан дойдуга, Россияҕа да олус интириэһинэй, киһи барыта документальнай тэттик киинэлэри устуохтарын баҕараллар. Билигин киинэ бастакы этааба түмүктэнэн эрэр. «Белый ангел» диэн ааттыахпыт. Салайар уонна устар бөлөх тэрилиннэ, хамаанда баар буолла. Республикаҕа үс улахан киинэ уһулла турар буолан арыый бытаардыбыт. Москваҕа Владимир Кузьмин диэн киинэ сценариһыгар үлэбитин биэрдибит уонна Лидия Облезова оруолугар кастинг ыытан артыыска көрдөөбүппүтүгэр 30-ча биллэр артыыскалар сырыттылар. Сыалбыт-сорукпут бу киинэ нөҥүө биһиги дьоруойбут хараҕынан Хоту дойду культуратын көрдөрүөхпүтүн баҕарабыт. Ол саҕанааҕы өйү-санааны, айылҕа оҕолорун сырдык-ыраас мөссүөннэрин. Билиҥҥи кэмҥэ Россияҕа ким эрэ туһугар бэйэтин толук биэрэр, бэриниилээх, үтүө санаалаах киһи туһунан киинэлэр көстүбэт буоллулар. Эбэҥкилии, сахалыы, нууччалыы тылларынан тахсыахтаах. Эпизодтарга оруоллары маннааҕы олохтоохтор оонньуохтара. Манна 2017 сыл кулун тутар ыйга бастакы хартыыналары уста кэлиэхпит. Киинэҕэ холбуу хоту дойду олоҕо-дьаһаҕа, табаларгыт, эбэҥкилии уруу үгэһэ, киһини көмүү сиэрэ, айылҕа кэрэ көстүүлэрэ, дьыл кэмнэрэ барыта киириэхтээхтэр. Устарбытыгар бөһүөлэк курдук кыра былаһаакка оҥоруохпут. Бу киинэҕэ бары санаабытын ууран биир хамаанданан үлэлээтэхпитинэ, биирдэ санаа хоту сатаныаҕа.

Өлөөн олохтооҕо Мария Афанасьевна эмчит нуучча кыыһа бастаан манна Өлөөҥҥө көтөн кэлбитин көрбүт тыыннаах туоһу буоларынан сиһилии кэпсээн, режиссер Александр Лукины олус үөртэ. Оттон Анна Семеновна ыстааданы, табалары усталларыгар дьыл ханнык кэмигэр кэлиэхтэрин сөбүн сүбэлээтэ. Манна даҕатан режиссер Никита Аржаков «Тыгын Дархан» киинэтигэр биһиги төрүт дойдубут былыргыта ахтылларынан Өлөөҥҥө эмиэ кэлэн устуо этэ диэн санааларын эттилэр. Көрсүһүү түмүгэр режиссер бу кэпсэтииттэн бэйэтигэр элбэҕи эбиммитин, урут билбэтэх түгэннэрин билбитин санаата көтөҕүллэн эттэ.

Следите за самым важным и интересным в Telegram-канале и WhatsApp-группе ЯСИА