Саха сиригэр «Сила Сибири» гаас ситимин устата сытар сэлиэнньэлэри уонна куораттары гаастааһыҥҥа бэлэмнэнии үлэтэ саҕаланыаҕа. Манна Ленскэй, Өлүөхүмэ, Алдан, Нерюнгри оройуоттара хабыллыахтара.
Ил Дархан Айсен Николаев «Быһа эфиргэ» эппитинэн, Өлүөхүмэҕэ үлэ 2024 сылга саҕаланыаҕа. «Инникилээн үлэ ыытыллара сабаҕаланар. Өлүөхүмэ улууһугар 17 нэһилиэнньэлээх пуун хабыллар: куоратыттан саҕалаан, кыра дэриэбинэлэргэ тиийэ. Үлэ 2024 сылга саҕаланыаҕа уонна 2025 сылга түмүктэнэригэр эрэллээхпин. Болдьох ыгым», — диэтэ регион баһылыга.
Санаттахха, 2030 сылга диэри өрөспүүбүлүкэҕэ гааһы 15 000 дьиэҕэ диэри тардар былаан баар. Ааспыт сылга 2800 дьиэ гааһынан хааччыллыбыта. Айсен Николаев бэлиэтээбитинэн, гаастааһын тэтиминэн Саха сирэ Уһук Илиҥҥэ бастакы, Россияҕа бэһис миэстэлэргэ турар.
