Өлөөн оройуонугар дьахтар хамсааһына уонна олохтоох «Сардаҥа» хаһыат тэрийиилэринэн «Дьиэ кэргэҥҥэ ийэ оруола» диэн тиэмэҕэ төгүрүк остуол ыытылынна.
«Чөл туруктаах Арктика» Эдьигээҥҥэ ыытыллыбыт форум кыттыылаахтарын ааттарыттан Сугулаан бэрэссэдээтэлэ Зоя Давыдовна Григорьева форумҥа сылдьан Эдьигээҥҥэ Кыстатыам нэһилиэгэ арыгыттан аккаастаммыттарын иһитиннэрдэ. «Биһиги Дьэлиҥдэбит нэһилиэгэ арыгыны атыылыыры тохтоторун туһунан суруга Ил Түмэҥҥэ бигэргэнэн кэллэ. Бу бачыымы атын нэһилиэктэр өйүүргүт буоллар. Аттыбытынааҕы улуустар олус бэркэ дьаһанан олороллор эбит. Ол курдук Эдьигээн олохтоохторо үлэ суоҕугар сигэммэккэ, оҕолорун кытта сайыҥҥы кэмҥэ үлэ миэстэтин таһааран үлэлииллэр эбит. Онтон Сааскылаахха үлэлээбэккэ олорор ийэлэр ураһа туттан, онно сөбүлүүр дьарыктарынан дьарыктаналлар. Биһиэхэ түөлбэ үлэтин сөргүтэр наада«, — диэтэ кини. Итини тэҥэ Зоя Давыдовна Анапаҕа бэйэни салайыныы 16-с Российскай форумугар кыттан элбэх саҥаны билбитин кэпсээтэ уонна эдэр салайааччылар маннык тэрээһиннэргэ кыттан уоппут атастаһалларыгар сүбэлээтэ.
Улууска эдэр ыаллар кулууптара 2007 сылтан тэриллэн, ыытыллар тэрээһиннэргэ көхтөөхтүк кытталлар. Киһи хайгыыра бу кулууп чилиэннэрэ ыарахан түгэҥҥэ түбэспит эдэр ыалларга, кинилэр оҕолоругар аһымал акциялары тэрийэн үп-харчы, өй-санаа өттүнэн өйөбүл, көмө буолаллар. Билигин бу кулуубу элбэх оҕолоох эдэр ыал ийэтэ Уваровская Е.А. салайар. Быйылгы сылга аһымал акциялары тэрийэн эмкэ барар оҕолорго, уоттан дьиэлэрэ эмсэҕэлээбит Томскайдарга харчынан, ыарахан түбэлтэҕэ түбэспит Герасимовтарга таҥас-сап атыылаһан көмөлөстүлэр.
Төгүрүк остуол тула эдэр ийэлэр кэпсэтиигэ кыттыбыттарын бэлиэтиир наада, эдэр дьон санаалара саҥалыы, идеялара элбэх, кинилэргэ эрэниэҕи баҕарыллар. Дьахтар оройуоннааҕы сэбиэтин бэрэссэдээтэлэ Петрова Т.Н. кыргыттарга, эдэр ыччаттарбытыгар хамсааһын тэрийэр наадатын эттэ. Бу тэрээһиҥҥэ кыттыбыт ийэлэр этиилэринэн кэлэр сыллааҕы былаан оҥоһуллан туһалаахтык үлэлииргэ диэн түмүктэннэ.
Ийэлэри Дьокуускай куораттан ыалдьыт Иван Ионович Дьячковскай-Кыталык Уйбаан, Өлөөн орто оскуолатын 2-с кылааһын үөрэнээччилэрэ, Настя Николаева, “Чипичакан» иитиллээччитэ Сашенька Никифорова, Миша Фадеев эҕэрдэлээтилэр. «Сардаҥа» хаһыат «Хотун ийэ» рубрикатын героинялара Полуэктова Р.И., Котельникова И.К., Константинова Т.К., Николаева Г.Д. ыалдьыттаатылар, оҕо иитиитигэр сүбэ-ама биэрдилэр.
