Быйыл Саха сиригэр судаарыстыбаннай эксээмэннэри сүүс баалга 28 оҕо тоҕус биридимиэккэ, ол иһигэр саха уонна эбээн тылларыгар туттарда. Сыл түмүгүнэн барыта 560 оскуоланы бүтэрээччи кыһыл уонна үрүҥ көмүс мэтээли ылла. Чопчу наукалары уонна естественнай-научнай биридимиэттэри туттарыан баҕалаахтар ахсаана, ону тэҥэ эксээмэннэргэ тургутууну ааспыттар өлүүлэрэ эмиэ улаатта.
«Сыллата көрдөрүү выпускниктар судаарыстыбаннай түмүктүүр аттестацияны ситиһиилээхтик туттаралларын туоһулуур. Бу 10-с кылааска салгыы үөрэнэргэ, кэллиэстэргэ, техникумнарга уонна үрдүк үөрэх кыһаларыгар киирэргэ мэктиэ буолар. Биһиги өрөспүүбүлүкэ оскуолаларын кытта идэтийбит хайысхаларынан бэлэмнэниини дириҥэттибит. Естественнай-научнай биридимиэттэргэ уонна профильнай математикаҕа эксээмэннэри талбыт выпускниктар ахсаана, ону тэҥэ тургутугу ааспыттар элбээбиттэр», — диэн Саха сирин үөрэҕин уонна наукатын миниистирэ Ньургуйаана Соколова иһитиннэрдэ.
Нуучча тылын сүүс баалга тоҕус выпускник, профильнай математиканы — алта, химияны — түөрт, физиканы — үс, төрөөбүт тылы уонна литэрэтиирэни — икки, литэрэтиирэни, географияны, устуоруйаны уонна информатикаҕа — биирдии киһи туттарда.
Миниистир этэринэн, былырыыҥҥыны кытта тэҥнээтэххэ, профильнай математиканы туттарааччы ахсаана 200 киһинэн элбээбит, бу биридимиэккэ 63 выпускник 90-тан тахса баалы ылла. Тургутугу ааспыттар өлүүлэрэ 92% тэҥнэспит. Физикаҕа эксээмэни быйыл 1114 киһи талбыт, алын кирбиини 95% ааспыт. Химияны туттарааччылар ахсаана 300-нэн элбээн, 981 киһиэхэ тиийбит.
2025–2026 үөрэх дьылын түмүгүнэн 9-с кылааһы бүтэрбит 15 066 выпускник уонна 11-с кылааһы бүтэрбит 8 171 выпускник баар, олортон 560-һа оскуоланы кыһыл уонна үрүҥ көмүс мэтээллэринэн бүтэрбит.
Орто анал үөрэх тэрилтэлэригэр 9-с уонна 11-с кылаастар базаларыгар 6800-тан тахса бүддьүөт миэстэтэ бэлэмнэммит. Үрдүк үөрэх кыһаларыгар 5277 бүддьүөт миэстэтэ арыллыбыт.
Санатан эттэххэ, Саха сирин баһылыга Айсен Николаев от ыйын 10 күнүгэр БКЭ уонна ГИА түмүктэринэн муҥутуур баалы ылбыт оскуола уонна кэллиэс выпускниктарын, ону тэҥэ Бүтүн Арассыыйатааҕы оскуола олимпиадаларын призердарын чиэстээтэ. Эксээмэннэргэ саамай үрдүк бааллары ылбыт выпускниктар 100 тыһыынча солкуобайдаах сэртипикээттэри туттулар.
