Уус Алдан улууһугар Курбуһахха «Эврика» физмат лааҕырга быйыл 30 оҕо сырытта. Манна оҕолор үөрэҕи уонна сынньалаҥы тэҥҥэ дьүөрэлээн, күннэрин туһалаахтык атаараллар. Бу туһунан нэһилиэк орто оскуолатын математикаҕа учууталыттан, лааҕырга иитээччинэн үлэлээбит Федора Аммосоваттан ыйыталастым.
«Лааҕырбыт начаалынньыга, физика учуутала Светлана Винокурова салайыытынан кэлэктиип биир сүбэнэн оҕолорго эргиччи туһалааҕы оҥорор сыаллаах-соруктаах үлэлээтибит. Бэһистэн сэттис кылааска диэри үөрэнэр оҕолор бэйэбит нэһилиэкпититтэн, Окоемовка диэн учаастактан, Бороҕонтон, Мирнэйтэн, Дьокуускайтан сырыттылар. Сарсыарда оскуолаҕа кэлэн маҥнай хайаан да сэрээккэлииллэр, онтон билиилэрин-көрүүлэрин хаҥатан күн аайы үстүү уруокка үөрэнэллэр. Уруокпут быыһыгар араас оонньуулаах, күрэхтэһиилээх буолан сонургууллар», — диэтэ Федора Гаврильевна.
Кини салгыы кэпсээбитинэн, оҕолорго эбиэт кэнниттэн сүүрүүлээх-көтүүлээх спортивнай уонна билиини-көрүүнү тургутар оонньуулары нэһилиэк спорка былаһааккатыгар тэрийэллэр. Нэдиэлэҕэ иккитэ буолар психолог чааһыгар тестирование, тренинг ыытылларын оҕолор наһаа кэрэхсээбиттэр. Итинник күн аайы кинилэр болҕомтолорун тардар, сэргэхситэр сонун, саҥа сүүрээни эрдэттэн былааннаан туруортаабыттара оҕолорго туһалаах буолбут.
Маны сэргэ оҕолор «Сэлээппэ күнүн», өбүгэлэр оонньууларын, Аҕа дойду улуу сэриитигэр кыттыбыт буойуннарга пааматынньыкка венок уурбуттарын, Улуу Кыайыыга анаммыт бэсиэдэлэри, атах тэпсэн олорон сэһэргэһиини, хамаандаларынан күрэхтэһиилэри улаханнык сөбүлээбиттэр. Киэҥ билиини биэрэр бэртээхэй лааҕыр туһунан доҕотторуттан истибит оҕолор эһиил «Эврикаҕа» хайаан да сылдьар баҕалаахтарын биллэрбиттэр.
Лааҕыр 2002 сылтан үлэлиир. Манна дьарыктаммыт оҕолор норуоттар икки ардыларынааҕы куонкурустарга, Бүтүн Россиятааҕы дистанционнай, Хотугулуу-Илиҥҥи аччыгый, өрөспүүбүлүкэтээҕи, улуустааҕы олимпиадаларга, конференцияларга кыттан хайаан да бириистээх миэстэҕэ тиксэннэр дьоннорун-сэргэлэрин үөрдэллэрин олохтоохтор үөрэ, киэн тутта кэпсииллэр.
