Кулаковскай аатынан норуоттар доҕордоһууларын дьиэтигэр «Кулаковский среди нас» трибьют-презентация буолла. Манна ааптар сэдэх кинигэлэрэ, өрөспүүбүлүкэ музейдарыттан киниэхэ анаммыт экспонаттар турдулар.
Тэрээһиҥҥэ классик олоҕун, айар үлэтин чинчийээччи учуонайдар кытыннылар, суруйар СИА.
Презентация былырыын ыам ыйыгар ыытыллыбыт «Алексей Елисеевич Кулаковский – духовный лидер Якутии» симпозиум биир чааһынан буолла. Тэрээһин өрөспүүбүлүкэ бастакы президиэнэ Михаил Николаев көҕүлээһининэн, Ил Дархан Айсен Николаев өйөбүлүнэн ыытылынна.
«Презентация сүрүн сыала – Кулаковскай саха култуурата уонна тыла сайдыытыгар үтүөлэрин үйэтитии. Биһиги музейбытыгар Кулаковскайдар аҕа уустарын тус маллара, экспонаттара харалла сыталлар. Чугас аймахтарыттан бэриллибиттэрэ. Холобур, «Песня о громе» рукопиһа баар. Бу быыстапка ураты, бүгүн эрэ манна турар», — диэтэ Чөркөөх «Якутская политическая ссылка» историко-мемориальнай музейын исписэлииһэ Изабелла Жерготова.
