Кинигэ ураты тутуллаах, ис хоһоонноох. Андрей Дмитриевич тус олоҕун уонна араас өрүттээх таһаарыылаах үлэтин нөҥүө ааспыт ХХ үйэ иккис аҥарыгар улуус, республика үрдүнэн тыа хаһаайыстыбатын сайдыытыгар улахан кылааты киллэрбит «Сельхозтехника» Мэҥэ-Хаҥаластааҕы холбоһугун уонна оччолорго дьон таһаарыылаах, айымньылаах үлэлэрэ сиһилии кэпсэнэр.
Маны сэргэ Андрей Дмитриев оҕо эрдэҕинэ сүүрэн-көтөн улааппыт Мыла үрэҕинээҕи Ходоро нэһилиэгин сирэ-уота, төрүттэрин түҥ былыргыттан саҕалаан олорон ааспыт дьон олохторо, күннээҕи түбүктэрэ эмиэ ойууланар. Кини аҕатынан Дмитрий Николаевич Саввинан уонна ийэтинэн Дария Семеновна Дмитриеванан хас даҕаны көлүөнэ хаан-уруу аймахтарын туһунан сиһилии суруйбута ааҕааччыны кэрэхсэтэр, сонурҕатар. Чугас аймахтарын үгүс ахтыылара болҕомтону тардаллар. Андрей Дмитриевич бииргэ төрөөбүт убайа Егор Дмитриевич Саввин туһунан кэпсэммитэ улахан интэриэһи үөскэтэр. Республика, улуус, нэһилиэк киэн туттуутунан билиниллибит учуонай хайа дьыалатыгар, чуолаан онно хостонор туһалаах баайдары быраҕыллыбыт өртүн ситэри туһаҕа таһаарыыга саҥа ньыманы арыйан олоххо киллэриитэ уонна ол производствоҕа киэҥник туһаныллыыта биһирэнэн, бүтүн аан дойдуга биллэр бөдөҥ академиктар М.В.Кельдыш, В.А.Коптюг, Н.В.Черскэй ааттарынан анал грамоталарынан наҕараадаламмыта даҕаны норуот хаһаайыстыбатыгар сүҥкэн суолталааҕын көстүүтэ, улахан сыанабылын туоһута. Ити үрдүк сыанабылы бииргэ алтыспыт доҕотторо СГУ профессордара В.С.Андреев (СГУ урукку ректора), И.И.Ковлеков боччумнаах ыстатыйалара бигэргэтэллэр.
Кэргэнэ Софья Гаврильевна кийиит быһыытынан Андрей Дмитриевич хаан-уруу аймахтарын, чугас дьонун-сэргэтин тустарынан бэрт истиҥник ырытан кэпсээһинэ ааҕааччыга сонун буолуо. Кийиит кыыс бу аймах эйгэтигэр саҥа киирээт да, кинилэр оҕолорун бэрт кыраларыттан харахтарын далыттан таһаарбакка бэйэлэригэр ыкса сыһыаран, дьиҥ сахалыы быһыыга-майгыга, төрөппүт сылаас тыыныгар бүөбэйдээн улаатыннаралларын бэлиэтии көрбүтэ уонна дьахтар киһи быһыытынан мындыр өйүгэр, кыраҕы хараҕар, чараас дууһатыгар сөп түбэһиннэрэн ити эйгэҕэ киирэн аймах үйэлээх үгэстэрин кэспэккэ олоруохтааҕын таба өйдөөбүтэ, чугастык ылыммыта. Ити кинилэр дьиэ кэргэни тэринэн уһуннук дьоллоохтук олорууларыгар, бэл диэтэр, олохторугар, сыһыаннарыгар улахан суолталаммыта.
А.Д.Дмитриев бииргэ улааппыт доҕотторун, чугас аймахтарын ахтыыларыгар тыа оҕотун сиэринэн, кыратыттан бары үлэҕэ, күннээҕи түбүккэ, тыа ыалын олоҕун кыһалҕатын билэн, эриллэн улааппыта ахтыллар. Ити кини инники олоҕор, үлэтигэр бигэ төрүтү уурбутун билигин билэбит. Кэлин республикаҕа биллэр-көстөр үлэлээх-хамнастаах дьоһун коллективка киирэн уонна онно уһун сылларга үлэлээн, сыыйа холбоһук биир улахан сыаҕын биригээдэтин салайааччы буолбута.
Биллэн турар, Андрей Дмитриевич курдук ураты бэлиэ, үгүс киһи ытыктабылын ылбыт бүтүн улуус, республика киэн туттар киһитин тустаах олоҕо, үлэтэ, коллективка, чугас доҕотторугар, хаан-уруу аймахтарыгар истиҥ доҕордуу сыһыана, үгүстэргэ холобур буолар түгэннэрэ элбэхтэр. Олор тустарынан маннык киэҥ далааһыннаах олоҕу олорбут, бииргэ алтыспыт табаарыстарын бэйэтин күүрээннээх, үрдүк таһаарыылаах үлэтинэн, үтүө холобурунан батыһыннарбыт, көҕүлээбит дьоһун киһи туһунан ааҕар, билсэр умсугутуулаах.
Семен Эверстов
