Быйылгы бэстибээлгэ Саха сириттэн аҕыс бааһынай хаһаайыстыба уонна Казахстан Өрөспүүбүлүкэтиттэн биир хаһаайыстыба — Нагашибай Барлубаев салайааччылаах «Аркалык» БХ кытынна. Кымыстарын бастыҥ холобурдарын Дьокуускай куорат, Хаҥалас, Горнай, Нам, Мэҥэ Хаҥалас уонна Уус Алдан улуустарыттан хаһаайыстыбалар аҕалан көрдөрдүлэр.
«Кымыс — Айыы аһа» бэстибээл 2015 сылтан Саха сирин Ил Дарханын Айсен Николаев көҕүлээһининэн ыытыллар. Бу кэм устата бэстибээл кымыһы оҥоруу үгэстэрин харыстааһыҥҥа, сылгыны иитиини сайыннарыыга, кымыһы доруобай аһылык быһыытынан киэҥник тарҕатыыга уонна олохтоох тыа хаһаайыстыбатын оҥорон таһаарааччыларын өйөөһүҥҥэ биир сүрүн былаһаакканан буолла.
Ыалдьыттар болҕомтолорун Казахстантан «Аркалык» бааһынай хаһаайыстыбата тарта. Хаһаайыстыба салайааччыта Нагашибай Барлубаев бэлиэтээбитинэн, бэстибээлгэ кыттыы саха сылгыһыттарын кытта уопут атастаһарга уонна идэлээх сибээстэри бөҕөргөтөргө үчүгэй кыаҕы биэрбит. «Биһиги промышленнай таһымҥа кымыс оҥоробут. 200 ыанньык биэлээхпит. Сылга 45–50 тыһыынча лиитирэ кымыһы оҥоробут. Биһиги уопут ыллыбыт, эһиги үгэскитин уонна ситиһиилэргитин үөрэттибит. Биһиги эһигини кытта ыкса сибээстээхтик үлэлиибит уонна эһигини аныгыс ыйга — от ыйын 10–11 күннэригэр Астана куоракка буолар Кымыс бэстибээлигэр күүтэбит», — диэн Нагашибай Барлубаев эттэ.
Кыайыылаахтары куонкурус тоҕус номинациятынан быһаардылар. Маны таһынан, бэстибээл сүрүн спонсорын — «Амурагроцентр» ХЭО дириэктэрэ А.В. Сарашкин — анал бирииһэ ананна.
«Кымыс — Айыы аһа» бэстибээл саха норуотун үгэс буолбут кымыстааһынын харыстааһыҥҥа, сайыннарыыга, кымыһы киэҥник тарҕатыыга, тыа хаһаайыстыбатын оҥорон таһаарааччыларын өйөөһүҥҥэ уонна ат сылгыны иитиини салгыы сайыннарыыга туһуламмыт.
Бэстибээлгэ Ил Дархан Айсен Николаев кыттааччылар бородууксуйаларын кытта билистэ, бэриллибит кымыһы амсайан хаачыстыбатын сыаналаата уонна бааһынай хаһаайыстыбалар салайааччыларын кытта ат сылгыны иитии, кымыһы оҥоруу уонна үгэс буолбут технологиялары харыстааһын тула кэпсэттэ.
