Сунтаар улууһугар терапевт-быраас үөрэхтээх Надежда Васильевна Брусенина үлэтин саҕалаата. Кини оройуон кылаабынай бырааһа Назаров Анатолий Николаевич ыҥырыытынан, «Земскэй доктор» бырагырааманан ананан кэллэ, суруйар «Сунтаар сонуннара» хаһыат.
Надежда Васильевна Брусенина бастаан Устьеҕа биэлсэрдиир, салгыы кэккэлэһэ сытар Күндэйэ нэһилиэгэр олохсуйан үлэлиир. Манна нэһилиэк баһылыга Константинов Иван Витальевич судаарыстыбаннай тосхолунан үлэлии кэлбит эмчит олорор усулуобуйатын тэрийэр, саҥа дьиэ туттарар.
— Сунтаарга кэлиибэр кылаабынай быраас Анатолий Николаевич улууска доруобуйа харыстабылыгар үлэ туһунан, быраастар наадаларын туһунан кэпсээбитэ. Онтон Күндэйэ нэһилиэгин баһылыга Иван Витальевич чахчы наадалаах исписэлиис кэлбит эбиппин диэн саныырбар тирэх буолла. Билигин эмчиккэ анаан балыыһа таһыгар тутуллубут наһаа үчүгэй, сып-сылаас, ып-ыраас, киэҥ-куоҥ чааһынай дьиэҕэ олоробун. Бу күннэргэ толору хааччыллыыны киллэрээри түбүгүрэ сылдьаллар. Интэриниэт баар. Онон үлэлиир, олорор усулуобуйа толору хааччылларыттан олус үөрэ сылдьабын. Сунтаар улууһа сайдыылааҕын, дьоно-сэргэтэ үтүө майгылааҕын, сайаҕаһын уруккуттан истэр, билэр этим. Ону миэстэтигэр үлэлии кэлэн биллим, — диэтэ быраас.
Ааптар: Иван Чагдинскай
