19 От ыйа 19.07
  • 21°
  • $ 87,88
  • 96,1

Көҥүл тустууга саха эдэр бөҕөстөрө өрөгөйдөөтүлэр

09:33, 08 июля 2016
Текст:
Читайте нас на
Яндекс Новости
ЯДВ

От ыйын 6 күнүттэн саҕалаан, Дьокуускайга «Триумф» спортивнай комплекска көҥүл тустууга «Азия оҕолорун» күрэхтэһиитэ өрө күүрүүлээх быһыыга-майгыга буола турар. Күрэхтэһии иккис күнүгэр Саха сирин хамаандата ситиһиилээхтик тустан көрөөччүлэрин астыннарда.


Оҕолорбут бастакы күн сэттэ мэтээллээх эбит буоллахтарына, иккис күн аҕыс мэтээллэнэн үөрүү өрөгөйүн биллилэр. Уолаттарбыт ордук 38 киилэҕэ күннээтилэр. Любомир Алешин — кыһыл көмүс, Егор Вензель – үрүҥ көмүс. Кинилэр сүрүн утарсааччыларын биир-биир туораталаан, бастакы миэстэни бэйэлэрин икки ардыларыгар былдьастылар. Любомир бастаан Егортан очукуонан хаалан иһэн, кэлин лаппа баһыйа тутан кыайда.

Өссө 63 киилэҕэ Албан Аввакумов азербайджан бөҕөһүгэр икки очукуонан бэрт кыһыылаахтык сабарыйтаран, кыайыытын мүччү тутта. Дьиҥэ күүһүнэн-уоҕунан тэҥ баайыылаах эрээри, улахан күрэхтэһиилэргэ уопута суоҕа таайдаҕа буолуо. Оттон 63 киилэҕэ Артем Аммосов уонна 85 киилэҕэ Николай Борисов боруонса мэтээллэр хаһаайыннарынан буоллулар.

Кыргыттарбыт төһө да кыһыл көмүс мэтээлгэ тиксибэтэллэр, күүстээх утарсааччыларыттан саллан-толлон турбакка, харса суох кииристилэр. Ол түмүгэр 34 киилэҕэ Герда Данилова иккис буолары ситистэ. Оттон 44 киилэҕэ Аэлита Яковлева, 57 киилэҕэ Антонина Яковлева үчүгэйдик тустан, үһүс бочуоттаах миэстэҕэ тигистилэр.

Дьэ, бу саха эдэр бөҕөстөрүгэр хаһан да умнуллубат үтүө түгэн буолар!

Чемпионат бастакы күнүттэн биһиги эдэр бөҕөстөрбүт үчүгэй бэлэмнээхтэрин, кыайыыга дьулуурдаахтарын, албан ааттаах тустууктары кытта тэҥҥэ хапсыһар кыахтаахтарын көрдөрдүлэр. Онон спорду таптааччылар саха үгэһинэн улаханнык саҥарбакка, аһара арбаан хайҕаабакка күлүкпүтүгэр эрэ имнэнэбит уонна салгыы ситиһиилээхтик кытталларын эрэнэ кэтэһэбит.

Следите за самым важным и интересным в Telegram-канале и WhatsApp-группе ЯСИА