Кулун тутар 22 күнүгэр Улуу киһиэхэ Тыгын Дархаҥҥа анаммыт улуустааҕы уруһуй күрэҕэр кыттааччылар сиртэн, айыылартан уруһуйдара табылларыгар көҥүллэтэр сиэрдэрэ-туомнара Нөмүгү сэлиэнньэтин Күөх Кытылыгар ыытылынна. Арыылаах алаадьынан, саламаатынан күндүлээтилэр.
Улуус биллиилээх краеведа П.Р. Ноговицын кэпсииринэн, Күөх Кытыл (Бахай) биир ытык сиринэн ааҕыллар. Саха төрдө Эллэй Өлүөнэнэн устан кэлэн, Саха сирин киэҥ нэлэмэн хочолордоох Ытык Хаҥалас сирин сөбүлээн, олохсуйардыы тохтообута.
«1989 сыллаахха прикладник-художник, сахаларга Айыы үөрэҕин биир бастакынан тэниппит уһуйааччы, биир дойдулаахпыт Роберт Никифорович Петров бу ытык сиргэ, Өлүөнэ эбэ биэрэгэр мэҥэ тааһы уурар. Саха биллиилээх скульптора, Россия худуоһунньуктарын чилиэнэ Петр Оготоев үлэлэспитэ. Мэҥэ тааска саха сүгүрүйэр Дьөһөгөй айыытын бэлиэтэ уонна рунанан суруллубут алгыһа гранит тааска хаһыллан оҥоһуллубут», — диэн кэпсиир алгыс кыттыылааҕа Галина Семенова.
«Орхидея» уонна «Айар-Кут» уруһуйдьуттар түмсүүлэрин 14 киһиттэн састааптаах бөлөҕө күөх кытылга 21 эмис-тот дьөһөгөй хаары хаһан аһыы сылдьарын алгыс ситимигэр дьүөрэлээтилэр уонна махтаннылар. Сиэри-туому алгысчыт, тойуксут, арчыһыт, норуот ырыаһыта, оҕолору олоҥхоҕо уһуйааччы Саха Өрөспүүбүлүкэтин үөрэҕириитин уонна култууратын туйгуна, учууталлар учууталлара, Ой нэһилиэгин Бочуоттаах олохтооҕо Пелагея Семенова оҥордо.
