29 Тохсунньу 29.01
  • -48°
  • $ 73,82
  • 83,32

Өймөкөөҥҥө «Сахабэчээт» күннэрэ

10:15, 11 апреля 2016
Текст:

Муус устар 4-7 күннэригэр «Сахабэчээт» автономнай тэрилтэ сүрүн дириэктэрэ Филипп Пестряков салалталаах айар бөлөх кэрэ айылҕалаах Өймөкөөн улууһугар Өймөкөөн, Сордоҥноох, Томтор, Үчүгэй нэһилиэктэрин олохтоохторун кытта көрсөн, сурутуу хампаанньатын ыытан кэллэ.


Өймөкөөн баһылыгын солбуйааччы Лилия Старкова, Сордоҥноох сүрүн специалиһа Лена Григорьева, Томтор баһылыга Алексей Винокуров уонна Үчүгэй баһылыга Валентин Атласов кэлбит суруйааччылары, суруналыыстары истиӨник көрсөн, ирэ-хоро сэһэргэстилэр.

Россия Суруйааччыларын сойууһун чилиэннэрэ «Чолбон» сурунаал сүрүн эрэдээктэрин солбуйааччы Гаврил Андросов, «Далбар хотун» сурунаал сүрүн эрэдээктэрэ Зинаида Архипова, «Полярная звезда» сурунаал эппиэттиир эрэдээктэрэ Ираида Попова уонна «Чолбон» сурунаал салаатын эрэдээктэрэ Иван Осипов-Уйбаан Ойуур Өймөкөөн, Сордоҥноох, Томтор, Үчүгэй оскуолаларыгар, бибилэтиэкэлэригэр сылдьан, айар түмсүү чилиэннэрин кытта ирэ-хоро сэһэргэстилэр, ыйытыыларыгар хоруйдаатылар. Баай ис хоһоонноох краеведческэй музейдарга сылдьан элбэҕи сэргээн көрдүлэр-иһиттилэр, билиилэрин хаҥаттылар.

Автономнай тэрилтэ салайааччыта Филипп Пестряков Томтор билийээри таптааччыларыгар «Сахабэчээт» бирииһигэр турнир тэрийэн ыытта, бэйэтинэн кыттан көҕүлээтэ. Олохтоохторго скандинавскай хаамыыга норуоттар икки ардыларынааҕы федерация инструктора Айталина Третьякова чөл олох уонна хаамыы туһунан кэпсээтэ, туһалаах сүбэ-ама биэрдэ.

Хас киэһэ аайы кулуупка олохтоохтор Культура уонна искусство колледжын устудьуоннара Саргы Горохова уонна Никола Михайлов бэртээхэй ырыаларын сэргээн истэн, лотореяҕа оонньоон, сурутуу акциятыгар кыттан улахан дуоһуйуу ыллылар. Кэнсиэргэ «Сахабэчээт» тэрилтэ үлэһиттэрэ көхтөөхтүк кытыннылар. Ол курдук Александр Лукин-Сандалы дьоро киэһэни хомоҕойдук салайан, ырыа ыллаан, суруйааччылар: Иван Осипов-Уйбаан Ойуур хомуска оонньоон, Гаврил Адросов уонна Зинаида Архипова бэйэлэрин хоһооннорун ааҕан мустубут дьону сэргэхситтилэр.

—   Дьон санаата кэлэн биһиги бородууксуйабытын атыыласта, онтон икки хаһыаппытыгар, үс сурунаалбытыгар балачча киһи суруттарда. Саамай үчүгэйэ сылдьыбыт нэһилиэктэрбитин кытта сибээспитин быспакка үлэлииргэ дуогабар түһэрсиибит буолла, — диэн түмүк оҥордо Филипп Пестряков.

0
0
Тутаах тыллар
29 января 29.01
  • -48°
  • $ 73,82
  • 83,32