29 Тохсунньу 29.01
  • -48°
  • $ 73,82
  • 83,32

Өймөкөөн Төрүтүгэр Пантелеймон Тулааһынап үбүлүөйүн бэлиэтээтилэр

11:53, 02 августа 2016
Текст:

Быйыл сыл саҥатыгар Ил Дархан Егор Борисов 2016 сылга Саха сирин биллиилээх дьонун төгүрүк үбүлүөйдээх сылларын бэлиэтииргэ аналлаах ыйаах таһаарбыта.


Өрөспүүбүлүкэ сайдыытыгар бэйэлэрин тус кылааттарын киллэрбит суолталаах дьон ортотугар Өймөкөөн улууһун Тарыныгар төрөөбүт Пантелеймон Тулааһынап аата эмиэ киирбитэ.

Төрүт нэһилиэгин салалтата улуу киһилэрин 100 сыллаах үбүлүөйүгэр анаммыт ыһыаҕы үс күн устата тэрийэн ыыппыта олус сонун тэрээһин быһыытынан сыаналаныан сөп. Ол курдук, поэт төрөөбүт Тарыныгар мотуордаах оҥочонон суруйааччылары сырытыннарыы, Төрүт нэһилиэгэр поэт олоҕор анаммыт театрализованнай көрдөрүү, поэт аатын тыа сирин култууратын дьиэтигэр иҥэрии, киниэхэ анаммыт мемориальнай дуосканы аһыы, Күөл учаастагар Өксөкүлээх сэргэтигэр эмиэ мотуордаах оҥочонон айаны тэрийии курдук интэриэһинэй ис хоһоонноох литературнай тэрээһини олохтоохтор да, кэлбит да ыалдьыттар да олус сэргии ылыннылар.

Аны күһүн сэтинньигэ Дьокуускайга поэт Пантелеймон Тулааһынап үлэлии сылдьыбыт Нам уонна Кэбээйи улуустара кыттыылаах улахан тэрээһин ыытыллыаҕа. Онно, биллэн турар, аатырбыт поэт биир дойдулаахтара Өймөкөөн улууһун Төрүтүн олохтоохторо улахан дэлэгээссийэнэн кыттыахтара, — диэн иһитиннэрдэ улуус баһылыга Михаил Захаров.

Саха аатырбыт поэтын үбүлүөйдээх тэрээһиннэрэ бу сыл бүтүөр диэри ыытыллыахтара. Оттон бастакы тэрээһин бэс ыйын ортотугар Пантелеймон Тулааһынап төрөөбүт түөлбэтиттэн Өймөкөөн Тарыныттан саҕаламмыта. Үбүлүөйдээх тэрээһиҥҥэ саха суруйааччыларын сойууһуттан поэттар Николай Винокуров-Урсун, Варвара Белолюбская-Аркук кыттыыны ылан, Тымныы полюһун олохтоохторун улаханнык үөртүлэр.

0
0
29 января 29.01
  • -48°
  • $ 73,82
  • 83,32