22 От ыйа 22.07
  • 26°
  • $ 88,02
  • 96,04

Өймөкөөҥҥө Куйдуһун муостата эмиэ айаны атахтаан эрэр

17:06, 04 июля 2017
Текст:
Читайте нас на
Яндекс Новости
ЯДВ

Бу күннэргэ Өймөкөөн улууһун Куйдуһун муостата алдьанан, айан-сырыы харгыстанан, олохтоохтор эмиэ кыһалҕаҕа түбэстилэр. Куйдуһун муостата өрөспүүбүлүкэтээҕи таһымнаах суолга турар. Онон тыын суолталаах боппуруоһу «СӨ айан суолун управлениета» ГКУ быһаарар кыахтаах. 


Муоста Өймөкөөн улууһун сиригэр-уотугар турарын быһыытынан, муниципалитет хонтуруолугар турар.

Улуус баһылыга Михаил Захаров иһитиннэрбитинэн, ыам ыйыгар ыытыллыбыт Куйдуһун муостатын өрөмүөннээһин аукционугар Мэҥэ Хаҥалас улууһун “Ахсыс сулус” тутуу фирмата кыайбыт. Ол эрээри, соторутааҕыта бу тэрилтэ эппиэтинэһин өйдөөн, аккаастанан кэбиспит. Аукцион, тендер курдук тэрээһиннэргэ дьалаҕайдык сыһыаннаһар тэрилтэлэри ким хонтуруоллуура буолла диэн боппуруос үөскүүр. Сайыҥҥы күн былдьаһыктаах кэмнэригэр аукционы хаттаан ыытыах диэтэххэ, үтүмэн бириэмэ барара чахчы, улуус дьаһалтатын салалтатыгар да тыҥааһыннаах боппуруостары быһаара охсорго уустуктары үөскэтэрэ биллэр.

Саҥа аукционы ыытыыга үгүс бириэмэни сүтэриэх курдукпутуттан, улууска ыксаллаах быһыы-майгы балаһыанньатын биллэрэн, Александр Долженков салайар “Бриз” суолу оҥорор тэрилтэтин кытта дуогабар түһэристибит. Бу күннэргэ тэрилтэ үлэтин саҕалыаҕа, — диэн бэлиэтиир баһылык Михаил Захаров.

Оттон “Бриз” тэрилтэ салайааччыта Александр Долженков быһаарарынан, уу түһэн биэрбэккэ, өрөмүөн үлэтэ улаханнык бытаарбыт.

Куруус таһар самосвал, ортотунан, 30 т хайа тааһын тиэйэр. Онно бэйэтин уйугун эбэн кэбис. Быһа холуйан, 50-60 т ыйааһыннаах таһаҕаһы Буор үрэх муостата уйар кыаҕа суох. Ол иһин, бастатан туран, бу үрэх уута түһэрин кэтэһэбит. Куйдуһун үрэх уута эмиэ улахан буолан, массыына кэстэрэ сылдьан буор кутарыгар уустуктардаах, — диэн бэлиэтиир кини.

Бу күннэргэ инбэлииттэр, оҕолоох дьон Куйдуһун муостатыгар суолу оҥорооччулар оҥорон биэрбит мас кирилиэстэринэн ыттан тахсан айанныыллар.

Олохтоохтор: “Ыһыахха массыына туоруур гына оҥорбут далаһа мастарын ылан кэбиспиттэр этэ. Биһиги суол оҥорооччулары эмиэ өйдүүбүт. Массыыналар туоруу сылдьан, сиҥнэ турар биэрэги өссө алдьатыахтарын сөп. Сэрэхэдийэллэрэ оруннаах. Ол эрээри, билигин кыһалҕалаах эрэ дьон айаҥҥа турунарын быһыытынан, саатар сатыы дьон суолун далаһалыыллара буоллар”, — диэн көрдөһөллөр.

Бу күннэргэ «Бриз» ХЭУо Куйдуһун муостатыгар хайа тааһын кутан, муоста өрөмүөнүн саҕалыахтаах. Улуус муниципалитетын баһылыга Михаил Захаров, Томтор уонна Сордоҥноох нэһилиэктэрин олохтоохторо окко тахсаары бэлэмнэнэллэрин өйдөөн, Куйдуһун муостатын өрөмүөннээһини хонтуруолга тутар.

Следите за самым важным и интересным в Telegram-канале и WhatsApp-группе ЯСИА
Тутаах тыллар