Саха Өрөспүүбүлүкэтин Ыччат бырабыыталыстыбатын чилиэннэрэ Судаарыстыбаннай Дуума дьокутааттарын быыбарыгар куоластааһыҥҥа кытыннылар.
«Биһиги ураты эрэгийиэҥҥэ олоробут. Саха сирэ — бу култууралар, үгэстэр уонна омуктар силбэһиилэрэ. Биһиги быыбардыыр учаастактарга кэлэммит, аҥаардас инникибит туһугар куоласпытын эрэ биэрбэппит. Биһиги бэйэбитин кэлин кэскиллээх сайдыыны тутар биир хамаанда буоларбытын көрдөрөбүт», — диэтэ Саха сирин Ыччат бырабыыталыстыбатын бэрэссэдээтэлэ Сергей Иванов.
Ыччат бырабыыталыстыбатын Инфраструктура сайдыытын департаменын чилиэнэ Александр Ермолаев быыбардааччы уонна өрөспүүбүлүкэтээҕи Киин быыбардыыр хамыыһыйаҕа үлэлиир.
Хаартыска: ЯСИА саайта
«Мин быыбарга мэлдьи сылдьабын — бу мин гражданскай позициям. Ол эрэн бу сырыыга мин учаастакка быыбардааччы эрэ быһыытынан буолбакка, ону тэҥэ өрөспүүбүлүкэ Киин быыбардыыр хамыыһыйатын чилиэнин быһыытынан баарбын. Миэхэ бу олус суолталаах: мин бары нуормалар тутуһуллалларын уонна процедура сокуоннайын кэтээн көрөбүн. Ыччат бырабыыталыстыбатын бэрэстэбиитэлэ быһыытынан, ыччат кыттыыта хайдах курдук суолталааҕын өйдүүбүн уонна холобур буола сатыыбын. Бастакы күн — саамай эппиэттээх, тоҕо диэтэххини, кини үс күннээх куоластааһын бүтүннүүтүн настарыанньатын биэрэр», — диэн Ермолаев үллэһиннэ.
Ыччат бырабыыталыстыба өрөспүүбүлүкэ уопсастыбаннай олоҕор кыттар, социальнай бырайыактары олоххо киллэрэр уонна былаас уорганнарын кытта хардарыта сибээстэһэр эдэр исписэлиистэри түмэр.
