Бу нэдиэлэҕэ СӨ Аартыка сайдыытыгар уонна хотугу норуоттар дьыалаларыгар министиэристибэ иһинэн биэдэмистибэ икки ардынааҕы оробуочай мунньаҕар Саха сирин уонна Иркутскай уобалас былааһын уорганнарын, Атыы-эргиэн бырамыысыланнай балаататын бэрэстэбиитэллэрэ, билим үлэһиттэрэ Аартыкаҕа тырааныспар ситимин сайыннарыыны дьүүллэстилэр.
Кинилэр инновационнай тиэхиньикэҕэ олоҕуран, Уһук хоту тырааныспар сырыытын хааччыйарга “Суол-иис каартатын” оҥоруу тула кэпсэттилэр.
Ил Түмэн экэниэмикэҕэ, инвестиционнай уонна бырамыысыланнай бэлиитикэҕэ сис кэмитиэтин бэрэссэдээтэлэ Павел Петров бырайыак стратегическай суолтатын бэлиэтээтэ.
«Аартыканы хааччыйарынан, харчы аахсарынан эрэ муҥурдаммакка, дьон олоҕун хаачыстыбатын тиһигин быспакка үрдэтиэхтээхпит. Маннык ирдэбил “Суол-иис каартатыгар” булгуччу киириэхтээх», — диэтэ норуот дьокутаата, суруйда Саха парламент саайт.
Хоту таһаҕаһы тиэйэр дьону өйүүргэ тиэхиньикэни саҥардыы 90% субсидиялыырга, тырааныспар түһээнигэр 50% чэпчэтиини биэрэргэ, гааһынан сапыраапкалыыр инфраструктураҕа бас билии түһээнин 0% олохтуурга этиилэри былааҥҥа киллэрэргэ быһаардылар.
Ону таһынан, инникитин хоту табаары тиэрдэргэ экипааһа суох түргэн тэтимнээх тиэхиньикэни туттууну ырытан көрүөхтэрэ.
Ол туһунан «Ил Түмэн» тустаах саайта иһитиннэрэр https://iltumen.ru/news/28183
Василий Кононов хаартыскаҕа түһэриитэ.
