Искусственнай ардаҕы ыҥырар Як-42 зондировщик-сөмөлүөт бүгүн, бэс ыйын 1 күнүгэр Уус- Алдан уонна Таатта оройуоннарыгар үлэлиэҕэ.
Куттала суох буолууну хааччыйар судаарыстыбыннай кэмитиэт бэрэссэдээтэлин бастакы солбуйааччы Иннокентий Андросов иһитиннэрбитинэн, Росгидромет сөмөлүөтэ олохтоох бириэмэнэн, бүгүн 11 чааска көтүөҕэ. Искусственнай ардахтары регион сиригэр- уотугар баһаар кутталын намтатарга ыҥыраллар.
Бэс ыйын 1 күнүнээҕи туругунан, өрөспүүбүлүкэҕэ 33 гектар иэннээх биир айылҕа баһаара баар (итинтэн 1,0 гектар – ойуур зоната, 32,0 гектара – тыа сирэ буолбатах). Саха сиригэр сезон саҕаланыаҕыттан барыта 17 ойуур баһаара бэлиэтэммит. Былырыын бу кэмҥэ 118 баһаар бэлиэтэммитэ.
