Саха сирин баһылыга Дьокуускайга олорор элбэх оҕолоох ыалларга көмөнү оҥорорго сорудахтаата. Айсен Николаев Арассыыйа бэрэсэдьиэнэ Владимир Путин приемнайыгар олохтоохтору кытары көрүстэ, диэн СИА-ҕа өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрдэ.
Элбэх оҕолоох Яндреевтар дьиэ кэргэн өрөспүүбүлүкэ баһылыгыттан көмө көрдөөтө. Ыал Сэргэлээх шоссеҕа саҥа тутуллубут чааһынай дьиэҕэ гааһы холбооһун боппуруоһун быһаарарга көрдөстө. Билиҥҥитэ үс оҕолоох ыал биирэ инбэлиит, кыбартыыраны арендалаан олороллор.
Саҥа гаас ситимин тутуу 2025 сылга былааннанар. Саха сирин баһылыга гаастааһын бырагырааматын ырытан көрөргө уонна техническэй кыах баар буоллаҕына, эһиил саҕалыырга сорудахтаата.
Тустаах сорудаҕы АО «Сахатранснефтегаз» тэрилтэтигэр биэрдилэр.
Ону таһынан, олохтоохтору кытары көрсүһүүгэ кыра оҕотун улахан оҕолоро үөрэнэр 3 №-дээх оскуолаҕа суруттарарга ыарахаттары көрсүбүт элбэх оҕолоох ийэ Любовь Гермогенова көмө көрдөөтө. Айсен Николаев куорат баһылыгар Евгений Григорьевка бу боппуруоһу тус хонтуруолга ыларга сорудахтаата.
