2022 сыл Ил Дархан Айсен Николаев ыйааҕынан, Ийэ сылынан биллэриллибитэ. Региоҥҥа ийэ буолууну, оҕо сааһы, дьиэ кэргэни өйүүр бырагыраамалар салҕанан барыахтара, итиэннэ саҥа миэрэлэр ылыллыахтара. Ол иһигэр 2022 сылга төрөөбүт оҕо 100 тыһ солк ылыаҕа, ийэ буолууну өйүүр бырайыактар үбүлээһиннэрин икки төгүл улаатыаҕа. Ханнык социальнай тосхоллорго күүскэ болҕомто уурулларын өрөспүүбүлүкэ баһылыга «Россия-24» федеральнайдааҕы телеханаалга эттэ, суруйар СИА.
«Ийэ оруолун, өрөспүүбүлүкэ духуобунай сыаннастарын үрдэтэр, уопсайынан дьиэ кэргэттэри, ийэ буолууну өйүүр сыалтан үүнэр үбүлүөйдээх сылы Ийэ сылынан биллэрбитим. Уопсастыба быһаарыыны олус үчүгэйдик ылынна. Ил Түмэҥҥэ сыллааҕы ыҥырыыбар 2022 сылга ылыллар миэрэлэр тустарынан иһитиннэрбитим.
Чуолаан, элбэх оҕолоох ыаллар, биэс уонна онтон элбэх оҕолоох, дьиэ ылыналларыгар төлөбүрдэр. Маннык миэрэ 2012 сылтан баар, ити эрээри манан сылга 50-60 ыал эрэ туһанар. Оттон уочаракка 1800 ыал баар. Бырабыыталыстыбаҕа бу көрүллэр төлөбүрдэр барыта тустаахтарга тиийэригэр сорудах бэрилиннэ, биэс сыл иһигэр. Оччоҕуна элбэх оҕолоох ыаллар дьиэлэнэр кыахтаналлар.
Билигин 700 оҕо иитиллэ сылдьар ыалларыгар төлөбүр икки төгүл улаатыаҕа. Ийэ буолууну өйүүр уопсастыбаннай тэрилтэлэри граннарынан өйүүр бырагыраама үбүлээһинэ икки төгүл улаатыаҕа.
Дьокуускайга ыарахан түгэҥҥэ түбэспит ийэни уонна оҕону өйүүр киин тутуллуоҕа. Хомойуох иһин, бу кыһалҕа баар, атын регионнарга эмиэ. Маны үс сыл иһигэр быһаарыахпытын наада. Уонна оҕону, ыалы, 2022 сылга оҕоҕо күн сирин көрдөрөр ийэлэри өйүүр сыалтан «Дети Столетия»диэн бырайыагы», — диэтэ салайааччы.
