2023 сылбыт буолара 8 хонук хаалла. Күн-дьыл барара, этэҥҥэ олордоххо, түргэн. Хайдах сыл ааспытын, үүнэр сылга туохха болҕомто ууруохха сөбүн ырытыһабыт, кэпсэтэбит.
Ахсынньы 19 күнүгэр Ил Дархан Туһаайыытын иһиттибит. Аспытын-үөлбүтүн бэйэбит оҥорон таһаарыахтаахпытын, доруобай, куттала суох аска болҕомто күүскэ ууруллуохтааҕын өссө биирдэ тоһоҕолоон бэлиэтээтэ.
Билигин тыа сирин биир кэлим сайыннарыыга элбэх бырагыраама үлэлиир, онтон биир сүрүнэ — бэйэ аһын оҥорон таһааран дэлэтии. Көҕүлүүр дьаһаллар тыа хаһаайыстыбатын министиэристибэтинэн бараллар.
Айсен Николаев түргэнник ситэр салааҕа бырайыактарда бэлэмнээҥ диэн туһааннаах биэдэмистибэлэргэ сорудахтаата. Сөбүлүү иһиттим. Тоҕо диэтэххэ, бу ааспыт сайыҥҥа «бэрэбиэркэҕэ» диэн ииппит үс индюкпут бары өттүнэн табыгастаах эбит дии санаатыбыт. Биир итэҕэстээх — аҕыйаҕы ииппиппит.
Онтон туһата диэн хара баһаам — доруобай ас, оҕо үлэҕэ үөрүйэхтэниитэ, бизнес-идея быһыытынан киһини сааһылааһына уо.д.а., диэн https://t.me/polina_fermer телеграм-ханаала суруйда.
