Ил Дархан Айсен Николаев муниципальнай тэриллиилэр баһылыктарын кытта дьыалабыай көрсүһүүтэ салҕанар. Олунньу 15 күнүгэр Амма улууһун салайааччыта Николай Архиповы кытта кэпсэттэ, СИА-ҕа өрөспүүбүлүкэ сүрүн пресс-сулууспата иһитиннэрдэ.
Ил Дархан Айсен Николаевка Амма оройуонун баһылыга Николай Архипов салайар улууһун билигин ыытар үлэтин уонна сайдыыга тосхолун туһунан иһитиннэрдэ.
2022 сылга Саха сирэ Амма Солобуодатын 370 уонна сири кытта үлэ 350 сылларын бэлиэтиир. Бу икки даатаны көрсө ыһыы иэнин кэҥэтиигэ уонна бурдугу тэнитиигэ, эбии аһылык баазатын хаҥатыыга сыаллаах үлэ ыытыллара былааннанар.
Ил Дархан Амма улууһун баһылыга Саха сиригэр сири кытта үлэ 350 сылынан өрөспүүбүлүкэтээҕи тэрийэр кэмитиэти уонна туспа былааны оҥорууга этиитин өйөөтө.
Билигин «Амма» тэрилтэ бурдугу кытта үлэҕэ биир бастыҥ хаһаайыстыбанан биллэр. Ааспыт сылта уотурбаны оҥорууга ылсыбыта. Олохтоох сиэмэни оҥорон таһаарыыга, тэнитиигэ күүстээх үлэни ыытар.
«2021 сыл, нэһилиэнньэ дохуотун үрдэтэр сыалтан, улууска Дьиэ кэргэн экономикатын сылынан биллэрдибит. Өрөспүүбүлүкэҕэ биллэриллибит Доруобуйа сылын кытта ыкса сибээстээх дии саныыбыт. Эт-сиин, өй-санаа уонна култуурунай өттүнэн бөҕө туруктаах уопсастыба дьиэ кэргэҥҥэ үөскэтиллэр, оттон туруктаах дьиэ кэргэнтэн доруобай уопсастыба олуга ууруллар», — диэтэ Николай Архипов.
Дьиэ кэргэн сылыгар анаан тэрээһиннэр былааннара тахсан, хас биирдии нэһилиэккэ тириэрдилиннэ. Чааһынай уонна дьиэ кэргэнинэн хаһаайыстыбалаахтар ортолоругар араас куонкурустар сылы быһа ыытыллыахтара, түмүгэр сыаналаах бириистэри тутуохтара. Үһүс миэстэҕэ — «Синтай» тыраахтыр, иккискэ – микрооптуобус, бастакыга – «Беларусь» тыраахтыр.
Өрөспүүбүлүкэ 100 сылыгар Амма улууһугар Гражданскай сэрии историятыгар анаммыт музей тэриллиэҕэ. Бырайыак улуус туризмҥа үлэтин биир хайысхатынан буолуоҕа.
