Арассыыйаҕа үлэлиир төрөппүттэргэ сыллааҕы төлөбүр көрүллэр. Ким уонна хаһан ылыан сөбүн туһунан Саха Өрөспүүбүлүкэтин үлэҕэ уонна социальнай сайдыыга миниистирин солбуйааччы Елена Теплякова быһа эфиргэ кэпсээтэ.
«2026 сыл бэс ыйыттан икки уонна онтон элбэх оҕолоох дьиэ кэргэттэр сыллааҕы төлөбүр ылыахтара. Төлөбүрү ыларга үлэлиир төрөппүттэр, оҕо иитэ ылбыт төрөппүттэр уонна опекуннар, НДФЛ төлүүр дьон, хапсаллар. Дьиэ кэргэҥҥэ икки уонна онтон элбэх оҕо баар буолуохтаах, оттон биир киһиэхэ тиксэр орто дохуот 1,5 тиийинэн олоруу алын кээмэйиттэн үрдүк буолуо суохтаах. Маны таһынан баай-дуол, дьиэ-уот, массыына учуоттанар — ирдэбиллэр биир кэлим босуобуйа биэриитин курдуктар. Бу үлэлиир уонна оҕолорун иитэр дьиэ кэргэттэри өйүүр үчүгэй кыах», — диэн Елена Теплякова бэлиэтээтэ.
Дьиэ кэргэҥҥэ төлөммүт подоходнай нолуогун (13%) уонна ставка нолуогун (6%) араастаһыытын төнүннэрэллэр. Ол аата, дьиэ кэргэн нолуога 6% эрэ буолар, оттон 7%-на дьиэ кэргэн бүддьүөтүгэр харчынан төннөр.
Төлөбүр сылга биирдэ бэриллэр. Харчыны Арассыыйа социальнай пуондата ыытар.
Сайабылыанньаны 2026 сыл бэс ыйын 1 күнүттэн алтынньы 1 күнүгэр диэри «Госуслуги», МФЦ эбэтэр Социальнай пуонда клиентскэй сулууспаларын нөҥүө биэриэххэ сөп.
Өйөбүл миэрэтэ Владимир Путин көҕүлээбит «Дьиэ кэргэн» национальнай бырайыагын чэрчитинэн олоххо киирэр.
