Хотугулуу-илиҥҥи федеральнай университет, мас-рестлинг Россиятааҕы федерацията уонна Россиятааҕы устудьуоннар спортивнай союзтара «Студенческая лига мас-рестлинга» ассоциация тэрийэр туһунан докумуоҥҥа илии баттаатылар, СИА-ҕа үөрэх кыһатын пресс-сулууспата суруйда.
Сэтинньи 9–11 күннэригэр Санкт-Петербурга бастакы аһаҕас Россиятааҕы устудьуоннар күрэхтэһиилэрэ буолар. Тэрийээччилэринэн улахан үлэ ыытылынна, диэтэ ХИФУ дириэктэрэ Анатолий Николаев.
«Устудьуоннар мас-рестлиҥҥа спортивнай лигаларын тэрийиигэ докумуоҥҥа илии баттаатыбыт. Мас-рестлины федеральнай уонна норуоттар ардыларынааҕы таһымҥа таһаарар баҕалаахпыт. Уопсай кыаҕынан устудьуоннарга араас чемпионаттары ыытарга былаанныыбыт, түһүмэхтэринэн. Устудьуоннар спортарын сайыннарыы бырагыраамата 2024 сылга диэри баар. Манна олоҕуран комплекснай спортивнай тэрээһиннэр ыытыллаллар», – диэтэ ректор.
