МО «Хаҥалас улууһа» дьаһалтатыгар 2022 с. тыа хаһаайыстыбатын оҥорон таһаарыытын өйүүргэ оройуоннааҕы бүддьүөттэн кимиэхэ гран биэрбиттэрин эттилэр. Барыта улуустан 23 сайаапка киирбит диэн, Ulus.Media иһитиннэрэр.
Куонкурус хамыыһыйатын 13 киһи ааста, кинилэр ортолоругар фермердэр Яков Егоров, Сергей Латышев уонна Евгений Никифоров. Гран суотугар хаһаайыстыбаларын оҥорон таһаарыыларын улаатыннарар былааннаахтар.
Яков Егоров чуолаан оҕуруот аһын үүннэриитинэн дьарыктанар, гран харчытынан ыһар уонна охсор тиэхиникэ атыылаһыан баҕарар. Оччотугар оҕуруот аһын олордор сирин иэнин 10- тан 20 гектарга диэри улаатыннарыан сөп.
Сергей Латышев хортуоппуй уонна оҕуруот аһын оҥорон таһаарыытын кэҥэтиэҕэ, ону тэҥэ, олордор сирин болуоссатын 7 гектарынан улаатыннарыаҕа.
Евгений Никифоров сылгы иитиитинэн дьарыктанар, от пресстиир уонна рулон оҥорор тиэхиникэни ылыан баҕарар. Ол түмүгэр хаһаайыстыбатыгар баар сылгы ахсаана 70 төбөнөн элбиэхтээх.
