Саха сирин олохтоохторуттан 20 %-на QR-кодтарын сатаан ылбаккалар эрэйи көрбүттэр. «Госуслуги» порталга баар тус кабинеткар быһыыны ылбыккытын туоһулуур, эбэтэр COVID-19 ыарыытынан ыалдьан баран үтүөрбүккүтүн бигэргэтэр сертификат кэлбэтэх буоллаҕына, туох миэрэни ылынар оруннааҕын Региону салайар киин биллэрдэ.
Сертификаты түөрт араас биричиинэнэн туппатах буолуоххутун сөп.
Бастатан туран, «Госуслуги» сайтыгар учуоттуур сурутуугут бигэргэтиллибэтэх. Иккиһинэн, тус дааннайгытын сыыһа толорбут буолуоххутун сөп, үсүһүнэн, медицина тэрилтэтэ сыыһыан син, эбэтэр порталга техническай моһуогуруулар мэһэйдээбиттэр.
Өскөтүн, учуоттуур сурутуугут бигэргэтиллибэтэх буоллаҕына, онлайн банк анал сыһыарыытынан бигэргэтиэххэ сөп, эбэтэр МФЦ киинигэр бара сылдьыахтааххыт.
Иккис биричиинэ сөп түбэһэр буоллаҕына, пааспар, СНИЛС, ОМС полиһын сыыппараларын өссө төгүл сөбүн-сыыһатын көрөн, хат киллэрэн баран бэрэбиэркэни кэтэһэҕит.
Ордук тарҕаммыт моһуогунан – медицинэ тэрилтэтэ хайа эрэ биричиинэнэн эн дааннайгын регистрга киллэрбэтэх, эбэтэр сыыһа киллэрбит. Маныаха, эмтэммит тэрилтэҕитин кытары хат төлөпүөн нөҥүө билсэҥҥин регистрга өссө төгүл киллэрэллэрин көрдөһөҕүн.
Биир даҕаны ньыма сөп түбэспэтэҕинэ, «Госуслуги» сайтыгар «QR-код и сертификат вакцинированного» диэн тиэмэни талалаҥҥыт, кыһалҕаҕытын суруйаҕыт, — диэн Региону салайар киин салайааччыта Василий Десяткин кэпсээтэ.
Коронавирус ыарыытынан ыалдьан баран, бырааска биллэрбэтэх буоллаххытына, сертификат бэриллибэт диэн өссө төгүл санаталлар.
