РФ Госдууматын депутааттарын талыыга быыбар бүгүн үһүс күнэ. Саха сиригэр барыта 794 быыбардыыр учаастак үлэлиир. Региоҥҥа Госдуума депутаттарын быыбарын кытта тэҥҥэ Ил Түмэн депутааттарын эбии быыбара, 29 оройуоҥҥа 76 муниципальнай быыбардыыр хампаанньалар ыытыллаллар.
2021 сыллааҕы биир кэлим быыбарга 14 политическай баартыйа кыттар. Саха сиринээҕи 24 №-дээх биир мандааттаах быыбардыыр уокурукка 9 кандидат баар.
Бүгүн, балаҕан ыйын 19 күнүгэр, куоластааһын үһүс күнэ.
20.00 чааска Саха сиригэр бары быыбардыыр учаастактар ааннара сабыллыаҕа. Сорох хоту улуустарга Дьокуускай бириэмэтинэн 18.00 чааска куоластааһын түмүктэниэҕэ.
Быыбардыыр учаастактарга санитарнай-эпидемиологическай ирдэбил тутуһуллар: мааска, бэрчээки, уруучука бэриллэр.
Саха сиринээҕи Киин быыбардыыр хамыыһыйа иһитиннэрбитинэн, бэҕэһээҥи күн түмүгүнэн, куоластааһыҥҥа кыттыы быыбардааччы уопсай ахсаанын 28,8% ылла. «Барыллаан ааҕыынан, икки күн устата Саха сиригэр 190 тыһыынчаттан тахса киһи куоластааһыҥҥа кытынна«, — диэн Киин хамыыһыйа бэрэссэдээтэлэ Евгений Федоров эттэ, суруйар СИА.
