Саха сиригэр муус устар 24 күнүттэн ыам ыйын 9 күнүгэр диэри «Георгиевская ленточка» Бүтүн Арассыыйатааҕы аахсыйа ыытыллар. Кыайыы волонтердара өрөспүүбүлүкэ олохтоохторугар хара-оранжевай өҥнөөх лиэнтэлэри түҥэтэллэр — Аҕа дойду улуу сэриитин сылларыгар сэбиэскэй норуот хорсун быһыытын кэриэстиир бэлиэ, диэн суруйда регион бырабыыталыстыбатын МАХ-ханаала.
Дьокуускайга лиэнтэни түөрт сүрүн түҥэтии миэстэтэ тэрилиннэ: Өрөспүүбүлүкэ, Кыайыы, Орджоникидзе уонна Доҕордоһуу болуоссаттарыгар. Киин куоракка 100-чэкэ волонтер, өрөспүүбүлүкэ үрдүнэн 1000-чаттан тахса баҕа өттүнэн үлэлээччи кыттар.
Саха Өрөспүүбүлүкэтин ыччат дьыалаларыгар уонна социальнай коммуникацияларга миниистирэ, анал байыаннай дьайыы бэтэрээнэ, «Биир Ньыгыл Арассыыйа» баартыйа регионнааҕы политическай сэбиэтин Президиумун чилиэнэ Петр Шамаев регионҥа 100 тыһыынчаттан тахса лиэнтэни түҥэтии былааннанарын иһитиннэрдэ. «Георгиевскай лиэнтэ — Аҕа дойду улуу сэриитин сылларыгар эһэлэрбит өйдөрүн-санааларын, хорсун быһыыларын дьоһуннаах бэлиэтэ. Аахсыйа наада диэн эрэнэбин. Барыгытын тэрээһиҥҥэ көхтөөхтүк кыттарга уонна кини суолтатын үүнэр көлүөнэҕэ кэпсииргэ ыҥырабын», — диэн Петр Шамаев эттэ.
Волонтердар лиэнтэлэри кытта сэргэ “Өйдүүбүт, киэн туттабыт!» диэн листовкалары түҥэтэллэр уонна бу символ суолтатын туһунан кэпсииллэр. «Георгиевскай лиэнтэ» аахсыйа сыала-соруга -историческай өйү-санааны харыстааһын, байыаннай албан аат бэлиэлэригэр ытыктабыллаах сыһыаны үөскэтии уонна бу сыаннастарын үүнэр көлүөнэҕэ биэрии. Георгиевскай лиэнтэ норуот байыаннай килбиэнин, дьоруойдуу быһыыны уонна сомоҕолоһуутун көрдөрөр, ону тэҥэ историческай кырдьыгы көмүскээһин суолтатын санатыы буолар.
